Viltu hitta SOS „barn“ frá Tíbet og Indlandi?

Fimmtudaginn 29. ágúst n.k. klukkan 17 gefst styrktaraðilum SOS á Íslandi og öðrum áhugasömum einstakt tækifæri á að hitta konu sem ólst upp í SOS barnaþorpi. SOS Barnaþorpin á Íslandi efna til viðburðar í salnum á veitingastaðnum Nauthóli þar sem Sonam Gangsang segir frá lífinu í barnaþorpinu og því sem við tók, menningunni, tengingu sinni við Ísland og fleiru ásamt því að svara spurningum úr sal. Sonam ólst upp í SOS barnaþorpi á Hima­læja há­slétt­unni fyrir börn landflótta Tíbetbúa.

SOS barnaþorp eru ekki eins og margir halda.

• Hvernig er að alast upp í SOS barnaþorpi?
• Hvað varð til þess að hún flutti í SOS barnaþorp?
• Hvaða áhrif hafði það á framtíð hennar?
• Er munur á framtíðartækifærum drengja og stúlkna á Indlandi?

Þessum spurningum og fleirum fáum við svarað á viðburði okkar á Nauthóli. 

Allir eru velkomnir meðan húsrúm leyfir en mikilvægt er að skrá sig annað hvort á Facebook-síðu viðburðarins eða með því að senda tölvupóst á sos@sos.is.

SKRÁNING HÉR

Þakkar stuðningi Ingibjargar frama sinn í dag

Sonam er ein af níu dætrum fátækra foreldra sinna sem flúðu Tíbet fótgangandi og sett­ust að Indlandsmegin við landamærin í bænum Leh. Það bjargaði framtíð fjölskyldunnar að í bænum er SOS barnaþorp þar sem Sonam og systur hennar fengu gott heimili og fría skólagöngu.

Sonam átti SOS foreldri á Íslandi, Ingibjörgu Steingrímsdóttur, sem Sonam þakkar hversu langt hún hefur náð í lífinu í dag. Hún kláraði kennaramenntun og starfar nú í menntamálaráðuneyti Tíbeta í útlegð þar sem hún hefur yfirumsjón með lestrarkennslu yngstu bekkjanna í 45 skólum fyrir tíbetsk börn á Indlandi og í Nepal.

Við höfum áður fjallað ítarlega um Sonam og Ingibjörgu eins og sjá má hér: Úr fátækt til frama

Í umsjón Evu Ruzu

SOS foreldrar á Íslandi og aðrir áhugasamir eru velkomnir í Nauthól meðan húsrúm leyfir til að hitta Sonam, hlýða á frásögn hennar og spyrja hana spurninga.

Kynnir og stjórnandi verður Eva Ruza, velgjörðasendiherra SOS Barnaþorpanna á Íslandi og SOS foreldri til margra ára. Fyrir svörum sitja Sonam Gangang og Hans Steinar Bjarnason, upplýsingafulltrúi SOS á Íslandi.
Veitingasala verður á staðnum.

Við ítrekum mikilvægi þess að skrá sig á viðburðinn.