Hér má sjá upplýsingar um framlög styrktaraðila SOS Barnaþorpanna á Íslandi og það hlutfall af fjármagni sem fer beint til styrkþega. Það sem eftir verður er varið í fjáröflun, umsýslu og eftirlit hér heima og á alþjóðavísu.
Sjá einnig: Svona er framlögum þínum ráðstafað - Grein fjármálastjóra SOS um fjármál samtakanna. Ársskýrslur og ársreikninga er að finna hér neðst.
SOS-foreldrar barna greiða minnst 3.900.- á mánuði. Sú upphæð nýtist í grunnþarfir barnsins, fæði, klæði, menntun, heilsugæslu og fleira. 85% upphæðarinnar renna óskipt til styrkþega. 15% af framlögunum nýtast í umsýslu, eftirlit með þorpunum og öflun nýrra stuðningsaðila.
Peningagjafir frá SOS-foreldrum renna óskiptar til styrktarbarnsins á framtíðarreikning barnsins.
SOS-foreldrar „allra barna“ greiða minnst 4.500:- á mánuði sem varið er í daglegan rekstur þorpsins svo tryggja megi öryggi og velferð þeirra barna sem þar búa. Þeir styrkja uppbyggingu, viðhald og almenna starfsemi barnaþorps. 85% upphæðarinnar renna óskipt til þorpsins. 15% af framlögunum nýtast í umsýslu, eftirlit með þorpunum og öflun nýrra stuðningsaðila.
Fjölskylduvinir greiða upphæð að eigin vali frá 1.500 krónum og upp úr sem fer í verkefni SOS Barnaþorpanna á Íslandi í fjölskyldueflingu erlendis. Að lágmarki 80% upphæðarinnar renna óskipt til verkefna. Að hámarki 20% framlagsins er nýtt í þjónustu við fjölskylduvini og öflun nýrra.
Fjölskylduefling SOS er forvarnarverkefni sem gengur út á að aðstoða sárafátækar fjölskyldur í leið sinni að sjálfbærni og sjálfstæði. Í fjölskyldueflingu SOS tökum við fyrstu skrefin með fjölskyldum út úr sárafátækt svo þær getið staðið á eigin fótum og veitt börnunum bjarta framtíð.
SOS á Íslandi fær ýmsar gjafir og staka styrki frá einstaklingum og fyrirtækjum. Það fjármagn hefur verið nýtt í erlend verkefni, rekstur skrifstofunnar hér heima og öflun nýrra styrktaraðila. Að lágmarki 80% frjálsra framlaga er ráðstafað í sjálft hjálparstarfið.
Opinber framlög til félagsins renna í þróunarverkefni erlendis. Af hverjum verkefnastyrk frá hinu opinbera leggur SOS á Íslandi til mótframlag. Því rennur allur styrkur hins opinbera auk framlags frá SOS Barnaþorpunum til verkefnanna.
Allt fjármagn sem SOS á Íslandi hefur í sinni vörslu er geymt hjá fjármálastofnun í innlánum eða hjá skráðum verðbréfasjóðum.
SOS Barnaþorpin hafa þróað innra eftirlitskerfi sem eykur mjög á öryggi í fjármálum samtakanna. Þá er það skýr stefna SOS Barnaþorpanna að hvers konar spilling og óreiða verði aldrei liðin.
Hér á Íslandi hefur SOS kappakostað að hafa gagnsætt bókhald og örugg fjármál með ýmsum leiðum.
Ársreikningur félagsins er endurskoðaður af löggiltum endurskoðanda og staðfestur með undirskrift hans. Ársreikningur er birtur á heimasíðu félagsins eins fljótt og unnt er eftir aðalfund.
SOS Barnaþorpin hafa aðgreiningu á milli verkþátta sem snýr að fjármálum. Allir reikningar eru samþykktir og sá sem greiðir reikninga færir ekki bókhald og sér ekki um afstemmingu á bankareikningum. Bókari hefur ekki millifærsluheimild í banka eða prókúru á hendur félaginu.
SOS Barnaþorpin á Íslandi reka ekki önnur dótturfélög eða systrafélög sem taka þátt í kostnaði eða tekjum starfsins. Öll innkoma í nafni SOS Barnaþorpanna á Íslandi kemur inn á kennitölu félagins, sem verið hefur sú sama frá upphafi árið 1989.