SOS Barnaþorpin styrkja starf fyrir fósturbörn á Íslandi

SOS Barnaþorpin hafa ráðstafað einni milljón króna af erfðagjöf Baldvsins Leifssonar í styrk til Félags fósturforeldra á Íslandi. Tilgangur styrksins er að efla starf félagsins í þágu fósturbarna hér á landi, þau fái betri þjónustu og betra líf. Honum er m.a. varið í fræðslunámskeið fyrir fósturforeldra og viðburði fyrir fósturbörn og -foreldra með áherslu á samveru, stuðning og fræðslu.

Styrkurinn hefur þegar nýst í fjármögnun á fósturfjölskylduhelgi í Vatnaskógi, viðburð sem félagið heldur tvisvar á ári til að efla tengsl milli fósturbarna og fósturfjölskyldna. 20 fósturfjölskyldur tóku þátt eða rúmlega 100 manns sem nutu vel skipulagðrar helgardagskrár í október og nærandi samveru frá föstudegi til sunnudags.

Viðburðurinn endurspeglar áhersluskilaboð SOS Barnaþorpanna, „Tilfinningaleg tengsl foreldra við börn geta breytt öllu“, sem er lausleg þýðing frá „Truly bonding with a child has the power to change the world.“ Þar er vísað í nýja rannsóknarskýrslu  alþjóðasamtaka SOS Barnaþorpanna sem dregur saman nýjustu þekkingu úr taugavísindum og sálfræði um mikilvægi öruggra og nærandi tengsla í lífi barna.

Þessi styrkveiting þykir til nokkrra tíðinda þar sem SOS Barnaþorpin á Íslandi eru ekki með innanlandsverkefni og hafa í raun eingöngu sinnt fjáröflun fyrir SOS barnaþorp og verkefni erlendis í þágu barna. Örfá fordæmi eru þó fyrir því að SOS á Íslandi styrki starf í þágu barna á Íslandi og eru samtökin opin fyrir frekari styrkveitingu til Félags fósturforeldra.

Myndir: Félag fósturforeldra.