45 grunnskólar með í Öðruvísi jóladagatali SOS

SOS Barnaþorpin á Íslandi bjóða grunnskólum landsins nú upp á Öðruvísi jóladagatal þriðja árið í röð og var fyrsti glugginn opnaður sl. mánudag, 3. desember. Á hverjum skóladegi í desember opna börnin nýjan glugga í dagatalinu og horfa á stutt myndbönd um börn frá ýmsum heimshlutum og aðstæður þeirra.

ÉG VIL STYRKJA SOS BARNAÞORPIN

Í kjölfarið geta nemendur safnað pening fyrir SOS Barnaþorpin, t.d. með því að vinna létt heimilisverk heima hjá sér. Öll framlög í ár fara í að bæta aðstæður flóttabarna sem koma til Grikklands og veita þeim tækifæri á menntun og frístundum.

Í ár eru 2312 nemendur í 45 grunnskólum með í jóladagatalinu. Börnin í fimmta bekk í Ártúnsskóla hafa verið með í jóladagatalinu frá upphafi og við heimsóttum þau þegar þau opnuðu fyrsta gluggann á mánudaginn. Þá sáu þau myndband um hinn 9 ára Myer í Kólumbíu og bræður hans tvo, 7 og 6 ára. Þeir fundust úti á götu árið 2009 þar sem foreldrar þeirra höfðu skilið þá eftir. Í dag búa þeir í SOS barnaþorpi og lifa góðu lífi.

Valdimar og Helena í fimmta bekk Ártúnsskóla ræddu við okkur um það sem þeim fannst áhugaverðast í myndbandinu og má horfa og hlusta á spjallið við þau hér að neðan.