13 milljónir til Nepal: Minnst 107 börn hafa orðið viðskila við foreldra sína

SOS Barnaþorpin á Íslandi hafa ákveðið að senda 13 milljónir króna til neyðaraðgerða SOS í Nepal eftir mannskæðu flóðin sem þar skullu á 26. ágúst sl. Mikill fjöldi Íslendinga hefur bæði gefið stök framlög til aðgerðanna eða skráð sig fyrir mánaðarlegum framlögum sem SOS-neyðarvinur. Í dag hafa safnast um tvær milljónir króna.

Flóðin eru mannskæðustu náttúruhamfarir í Nepal frá jarðskjálftanum mikla árið 2015. Í neyðaraðgerðum SOS Barnaþorpanna í Nepal er sérstök áhersla lögð á vernd barna. Talið er að að minnsta kosti 107 börn hafi orðið viðskila við foreldra sína eða umsjónarfólk í hamförunum. Slíkar aðstæður auka verulega hættuna á vanrækslu, misnotkun og mansali.

Yfir 1.200 manns hafa látist, 3.916 er saknað og hamfarirnar hafa haft áhrif á líf 1,6 milljóna manna, þar af um 17.000 barna.

Fylgdarlausum börnum tryggð umönnun

Starfsfólk SOS vinnur nú að því að finna og skrá börn sem eru ein á ferð eða hafa misst báða foreldra sína, hafa uppi á fjölskyldum þeirra og sameina þau á ný. Þar sem þess er þörf verður börnunum tryggð örugg tímabundin umönnun.

Neyðin í Nepal og aðgerðir SOS

• Að minnsta kosti 107 börn kunna að hafa orðið viðskila við foreldra sína eða umönnunaraðila.
• Unnið er að skráningu barnanna, leit að fjölskyldum þeirra og sameiningu fjölskyldna.
• Börnum sem ekki er hægt að sameina fjölskyldum sínum strax verður tryggð tímabundin og örugg umönnun.
• Gert er ráð fyrir að um 40 börn verði tekin í tímabundna umönnun SOS Barnaþorpanna í Nepal í nánu samstarfi við stjórnvöld.
• Komið verður upp barnvænum svæðum (Child-Friendly Spaces) þar sem börn fá öruggt skjól, stuðning og ráðgjöf. Tvö slík svæði eru þegar í undirbúningi.
• Veittur verður andlegur stuðningur og ráðgjöf til barna og fjölskyldna sem hafa orðið fyrir áföllum.
• Neyðaraðstoðin felur einnig í sér matvæli og næringarstuðning, neyðarskýli, hreinlætisaðstöðu og fjárhagsaðstoð.
• Komið verður upp tímabundinni kennsluaðstöðu svo börn geti snúið aftur til náms þrátt fyrir að skólar hafi skemmst eða eyðilagst.

SOS Barnaþorpin ætla að setja alls eina milljón evra í neyðaraðgerðirnar frá aðildarlöndum samtakanna. Áætlað er að eyðaraðgerðir SOS muni ná til um sex þúsund íbúa á hamfarasvæðunum á átján mánuðum eða fram í febrúar árið 2028.

Sjá einnig: Börn í Neyð í Nepal

Allir heilir á húfi í barnaþorpunum

Öll börn og fjölskyldur í verkefnum SOS eru heil á húfi og ekk­ert barna­þorp­anna varð fyr­ir beinu tjóni. Um 330 börn í SOS barnaþorpum í Nepal eiga íslenska styrktarforeldra (SOS-foreldra).

Þessi frétt er byggð á upplýsingum frá SOS Barnaþorpunum í Nepal og alþjóðaskrifstofu SOS í Austurríki.