10 milljónir króna til Venesúela - „Við höfum aðeins séð upphaf þessara hörmunga“

„Við höfum aðeins séð upphaf þessara hörmunga. Nú fyrst munum við sjá raunverulegu afleiðingarnar,“ segir Ilvania Martins, framkvæmdastjóri SOS Barnaþorpanna í Venesúela, sem hefur undanfarna daga verið á vettvangi í La Guaira, einu þeirra svæða sem urðu verst úti í jarðskjálftunum sem riðu yfir norðurhluta landsins 24. júní og hafa nú kostað nærri fimm þúsund manns lífið.

SOS Barnaþorpin á Íslandi hafa sent 10 milljónir króna til neyðaraðgerða SOS Barnaþorpanna í Venesúela. Mikil og góð viðbrögð hafa verið við ákalli okkar til almennings hér á landi um að gerast SOS neyðarvinur og leggja sitt af mörkum.

„Við erum innilega þakklát fyrir samstöðuna og stuðninginn. Öllu söfnunarfé verður ráðstafað á samræmdan og ábyrgan hátt, í samræmi við þær þarfir sem teymi okkar í Venesúela hefur skilgreint sem brýnastar,“ segir Ilvania.

Bíða enn í von um að ástvinir finnist á lífi

Þótt þrjár vikur séu liðnar frá hamförunum heldur óvissan áfram. Björgunaraðgerðir standa enn yfir, rústir eru hreinsaðar og fjölskyldur bíða í von um að ástvinir finnist á lífi. Um leið hafa yfir 1.300 eftirskjálftar verið skráðir.

„Í hvert skipti sem jörðin skelfur er eins og við upplifum stóra skjálftann aftur. Það hefur aukið kvíða, ótta og óvissu meðal fólks,“ segir Martins sem hefur staðið í ströngu.

Áfallastreita, ótti og næturmartraðir hjá börnum

SOS Barnaþorpin hafa verið við störf frá fyrsta degi. Samtökin hafa opnað gjaldfrjálsa sálræna neyðarlínu og veitt bæði sálrænan stuðning í síma og á vettvangi í Caracas, La Guaira og Aragua. Það eru þó ekki aðeins sýnilegu skemmdirnar sem valda áhyggjum.

„Við sjáum áfallastreitu, ótta, næturmartraðir hjá börnum, kvíðaköst og mikinn ótta. Mörg börn hafa misst heimili sín og þurft að flytja í neyðarskýli. Jafnframt þurfum við að styðja foreldrana og aðra umönnunaraðila, því þeir þurfa styrk til að geta stutt börnin,“ segir hún.

Svona hjálpar SOS

Nærri 18.000 manns eru enn heimilislausir og dvelja margir í einu af 158 bráðabirgðaskýlum sem komið hefur verið upp víðs vegar um landið. SOS Barnaþorpin hafa þegar dreift neyðarpökkum með mat, lyfjum og hreinlætisvörum til um 2.500 einstaklinga og komið á fót öruggum svæðum þar sem börn geta leikið sér og fengið stuðning. Martins segir þó að fjármögnun sé stærsta áskorunin.

„Um leið og við höfum fjármagnið getum við ráðið fleira sérhæft starfsfólk og náð til mun fleiri barna og fjölskyldna.“

Gleymið okkur ekki

Þrátt fyrir allt segir hún gleðiefni að börnin í verkefnum SOS Barnaþorpanna séu örugg.

„Við reynum að halda í daglegar venjur barnanna og styðjum jafnframt starfsfólkið okkar. Þetta er gríðarlega erfiður tími fyrir alla. Það eru varla til orð sem lýsa því.“

Að lokum sendir hún skýr skilaboð til fólks um allan heim:

„Vinsamlegast gleymið okkur ekki. Fréttirnar hverfa fljótt úr kastljósinu, en hörmungarnar halda áfram. Jarðskjálftarnir skildu eftir sig sýnilegar sprungur í byggingum en líka ósýnilegar sprungur í sálum barna og fjölskyldna. Við verðum að hjálpa þeim að endurheimta drauma sína og vonir.“