Venesúela: Jarðskjálftar hafa áhrif á þúsundir barna

Öflugir jarðskjálftar hafa riðið yfir Venesúela með þeim afleiðingum að þúsundir manna hafa orðið fyrir áhrifum og tala látinna hækkar. Börnin og starfsfólkið í SOS barnaþorpunum í Venesúela eru óhult en reynslan hefur tekið á. 62 börn í barnaþorpum í Venesúela eiga styrktarforeldra á Íslandi, þ.e.a.s. SOS foreldra.

Fjölskyldur hafa misst heimili sín og börn eru í brýnni þörf fyrir vernd, mat og hreint drykkjarvatn. Mörg börn hafa orðið viðskila við fjölskyldur sínar og eru í aukinni hættu. Því er lífsnauðsynlegt að finna þau, vernda þau og sameina fjölskyldur á ný.

Vertu SOS neyðarvinur og styrktu starf SOS í Venesúela

SOS Barnaþorpin á Íslandi ætla að senda fjármagn til neyðaraðgerða SOS í Venesúela. Fólki á Íslandi gefst kostur á að styrkja starfsemi SOS í Venesúela með því að gerast SOS neyðarvinur. Hægt er að greiða stakt eða mánaðarlegt framlag. Ljóst er að framundan er langt uppbyggingarstarf í Venesúela.

Skjót viðbrögð skipta sköpum

Nú beinist áhersla okkar að því að:

• finna börn sem hafa orðið viðskila við fjölskyldur sínar, tryggja þeim vernd og sameina fjölskyldur á ný,
• veita sálfélagslegan stuðning,
• koma upp tímabundnu húsnæði og útvega neyðaraðstoð á borð við matarpakka, hreint drykkjarvatn og peningaaðstoð,
• skapa örugg svæði og tímabundið námsumhverfi þar sem börn geta haldið áfram að leika sér, læra og endurheimta öryggiskennd sína.

Starfsemi SOS skammt frá upptökum skjálftans

SOS Barnaþorpin hafa starfað í Venesúela í nærri 50 ár og eru með starfsemi á þremur stöðum í landinu. Eitt barnaþorpanna er í Maracay, skammt frá upptökum skjálftanna. Börnin og starfsfólkið eru óhult, þótt reynslan hafi verið erfið. Við fylgjumst grannt með þróun mála og aðlögum starf okkar eftir þörfum til að geta stutt börn og fjölskyldur með sem bestum hætti.