TINNA hlýtur Fjölskylduviðurkenningu SOS Barnaþorpanna
TINNA, fjölskylduefling í Breiðholti á vegum velferðarsviðs Reykjavíkurborgar, hlaut í dag Fjölskylduviðurkenningu SOS Barnaþorpanna á Íslandi á alþjóðlegum degi fjölskyldunnar. Félags- og barnamálaráðherra, Ásmundur Einar Daðason, afhenti viðurkenninguna sem veitt er til að heiðra og vekja athygli á framúrskarandi góðu starfi hér á landi í þágu barnafjölskyldna.
„TINNA endurspeglar gildi SOS Barnaþorpanna um mikilvægi fjölskyldunnar og að börn geti alist upp í ástríku og öruggu umhverfi. Starfsfólk TINNU vinnur persónulegt og óeigingjarnt starf, oft utan hefðbundins vinnutíma, í þágu barnafjölskyldna í Breiðholti. Fjölskylduefling er einn af stærstu þáttunum í starfsemi SOS Barnaþorpanna og hefur komið í veg fyrir aðskilnað hundruð þúsunda barna frá foreldrum sínum í 126 löndum,“ segir í umsögn valnefndar.
TINNA er tilraunaverkefni sem sett var á laggirnar árið 2016 í samvinnu við Velferðarráðuneytið. Verkefnið heyrir undir þjónustumiðstöð Breiðholts og er staðsett í fjölskyldumiðstöðinni í Gerðubergi.
Tilgangur TINNU-verkefnisins er að auka lífsgæði foreldra og barna, rjúfa vítahring fátæktar og um leið félagslega arfinn þ.e. að auka líkurnar á að börnum þessara foreldra vegni betur í framtíðinni en foreldrunum.
Í valnefnd SOS fyrir viðurkenninguna eru: Drífa Sigfúsdóttir og Sigrún Júlíusdóttir, þaulreyndar í störfum sem varða málefni fjölskyldunnar, Nichole Leigh Mosty, fulltrúaráði SOS Barnaþorpanna á Íslandi og Ragnar Schram, framkvæmdastjóri SOS.
Verkefnisstjóri TINNU er Þuríður Sigurðardóttir, félagsráðgjafi. Ásamt henni á myndinni eru Marta Joy Hermannsdóttir, Hildigunnur Magnúsdóttir og Diljá Kristjánsdóttir. Ásmundur Einar Daðason, félags- og barnamálaráðherra afhenti þeim viðurkenninguna fyrir SOS Barnaþorpin.
Fjölskylduviðurkenning SOS Barnaþorpanna er nú veitt fjórða árið í röð en hana hafa áður hlotið;
• Miðstöð foreldra og barna (2016)
• Foreldrasamtök gegn áfengisauglýsingum (2017)
• Kennarar (2018)
Nýlegar fréttir
Erfðagjöf Baldvins fjármagnar kaup á húsum fyrir SOS fjölskyldur á Máritíus
SOS Barnaþorpin á Íslandi hafa ákveðið að fjármagna kaup á þremur húsum fyrir munaðarlaus og yfirgefin börn á eyjunni Máritíus. SOS á Íslandi sendir 31,5 milljónir króna til húsnæðakaupanna og er um a...
Óvissa um framtíð peningagjafa til barnanna
Í mörg ár hafa SOS-foreldrar geta gefið styrktarbörnum sínum peningagjafir inn á framtíðarreikning sem börnin leysa út þegar þau flytja á brott úr barnaþorpinu og fara að standa á eigin fótum. Nú ríki...