119 þúsund söfnuðust á hagyrðingakvöldi
119 þúsund krónur söfnuðust á hagyrðingakvöldi SOS Barnaþorpanna sem haldið var í Fáksheimilinu í Víðidal 8. nóvember sl. Efnt var í fyrsta sinn til þessa fjáröflunarviðburðar sem gekk vonum framar og til stendur að endurtaka leikinn á næsta ári.
Hagyrðingakvöld eru algeng og vel sótt á landsbyggðinni en fágætara er að slíkir viðburðir séu haldnir á höfuðborgarfsvæðinu. Þessu tóku margir fagnandi og var ógleymanleg stemning í Fáksheimilinu þetta kvöld.
Við þökkum kærlega fyrir okkur, þeim fjölmörgu áhorfendum sem mættu og þeim hagyrðingum sem fram komu og fóru á kostum. Þau voru Kristján Hreinsson, Sigurlín Hermannsdóttir, Sigurlína Davíðsdóttir, Ómar Ragnarsson og Ragnar Ingi Aðalsteinsson en sá síðastnefndi var jafnframt stjórnandi og kynnir.
Allur ágóði rann til SOS Barnaþorpanna og safnaðist féð með aðgangseyri, keyptum vísum og frjálsum framlögum. Þrjú fyrirtæki styrktu okkur með veitingum sem innifaldar voru í aðgangseyrinum. Flatkökur voru frá Kökugerð HP á Selfossi, hangikjöt frá SS og kleinur frá Myllunni og kunnum við þeim einnig bestu þakkir fyrir.
Margur verður úti á heimsins hjarni
er hlaupum við um í leit að drasli og skarni
það er þarflaust að spyrja,
ekkert þras, nú má byrja
og í SOS get ég bjargað einu barni.
(Sigurlína Davíðsdóttir)
Um öryggi láta jú allir sig dreyma,
að eiga sinn stað sem er kallaður ‚heima‘
en vond er oft veröld og grá.
Er börn úti í heimi á hrakhólum lenda
þá heimili býðst þeim, þú pening mátt senda
þau styrk bæði og stuðninginn fá.
(Sigurlín Hermannsdóttir)
Nýlegar fréttir

Héldum að við yrðum drepin
Í apríl sögðum við frá rýmingu barnaþorps í höfuðborg Súdan vegna blóðugra átaka í nágrenni þess. Í kjölfarið var þorpið svo hertekið af vopnuðum sveitum og haldar þær enn til í barnaþorpinu.

Umbætur hjá SOS í kjölfar rannsóknarskýrslu
Árið 2021 greindum við frá því að niðurstöður tveggja óháðra rannsókna hafi leitt í ljós ýmsa misbresti í stjórnun SOS Barnaþorpanna á alþjóðavísu og í einstaka löndum. SOS Barnaþorpin á Íslandi áttu ...