Faldi óléttuna til að geta verið í skóla
Besta leiðin til að koma í veg fyrir aðskilnað barna við foreldra þeirra er að hjálpa þeim og foreldrunum áður en til aðskilnaðar kemur. Þess vegna settu SOS Barnaþorpin á laggirnar Fjölskyldueflingu.
*Babette er 18 ára stúlka í Sambíu sem missti foreldra sína þegar hún var lítil og eftir að amma hennar dó fyrir fjórum árum var hún ein á báti, 14 ára. Þegar hún varð svo barnshafandi 17 ára hrundi heimur hennar. Babette ákvað að leyna óléttunni því hún óttaðist að þurfa að hætta í skólanum.
„Ég var svo örvæntingarfull. Hvernig átti ég að geta verið áfram í skóla og hugsað um ungabarn á sama tíma? Ég vissi ekkert hvernig á að hugsa um barn,“ segir Babette með þriggja mánaða gamlan son sinn Noah. Hún veit að menntun er hennar eina leið út úr fátæktinni.
Fjölskylduefling SOS kom til bjargar![Zambia_FSP Livingstone_Babette_foto Paal Audestad (1).jpg Babette með Noah litla](/media/5yxjb0ch/zambia_fsp-livingstone_babette_foto-paal-audestad-1.jpg?width=400)
Babette ákvað að bíta á jaxlinn þegar Fjölskylduefling SOS Barnaþorpanna tók þessa ungu fjölskyldu undir sinn verndarvæng. Hún fann til ábyrgðar gagnvart frænku sinni og tveggja ára syni hennar sem höfðu flutt inn á heimilið eftir að amman dó. Frænkan passar *Noah á meðan á meðan Babette fer í skólann.
Húsið var í niðurníðslu en með tilkomu Fjölskyldueflingarinnar hefur SOS nú bætt aðstæður fjölskuldunnar til muna. Sett hafa verið upp sólarorkuljós inni á heimilinu svo Babette geti gert heimalærdóm sinn á kvöldin. Þar að auki hefur verið sett læsanleg hurð á húsið, gler í gluggana og þak á húsið sem áður lak í rigningarveðri.
Nám í stað ótta og óvissu
„Ég ligg oft andvaka á næturnar og hugsa um hvernig lífið mitt verður. Ég veit að ég verð að leggja hart að mér í náminu svo það verði eitthvað úr mér í framtíðinni. Þá get ég veitt syni mínum gott líf í stað þess að lifa í ótta og óvissu,“ segir Babette sem ætlar að verða blaðamaður.
Saga Babette gefur góða innsýn í það hvernig Fjölskylduefling SOS Barnaþorpanna hjálpar sárafátækum barnafjölskyldum. Samtökin eru með 574 slík verkefni í gangi um allan heim sem eru sérsniðin að aðstæðum á hverjum stað fyrir sig. SOS á Íslandi fjármagnar þrjú þessara verkefna, í Eþíópíu, Perú og Filippseyjum.
*Raunverulegu nafni breytt
Yfir hálf milljón skjólstæðinga
Skjólstæðingar Fjölskyldueflingar SOS Barnaþorpanna á heimsvísu eru alls 505,800 talsins í yfir 98 þúsund fjölskyldum.
Hægt er að verða SOS-fjölskylduvinur með því að skrá sig fyrir mánaðarlegu framlagi að eigin vali. Fjölskylduvinir fá reglulega fréttir af þeim fjölskyldum sem SOS á Íslandi hjálpa.
Fjölskylduefling SOS nær til heimsmarkmiða Sameinuðu þjóðanna um sjálfbæra þróun og uppfyllir markmið númer 1, 2, 3, 4, 5 og 6. SOS Barnaþorpin uppfylla heimsmarkmið númer 1, 4, 8, 10 og 16 að fullu og markmið númer 3,5 og 17 að hluta.
SOS foreldri
Vertu SOS foreldri
![SOS foreldri](/media/orabl3fb/barnaþorp1.jpg?width=410&height=200&mode=crop)
SOS-foreldri tekur þátt í að framfleyta barni sem áður var umkomulaust og tryggir því fjölskyldu á góðu heimili. Barnið fær menntun og öllum grunnþörfum sínum mætt. Þú færð reglulega fréttir og myndir af SOS-barninu þínu.
Þegar þú velur að styrkja „öll börn“ styrkirðu öll börnin í einu SOS barnaþorpi og færð almennar fréttir úr tilteknu barnaþorpi.