Fréttayfirlit

Stuðningur án landamæra

Stuðningur án landamæra

Engu líkara er en að Jón Pétursson hafi vitað að hann ætti skammt eftir ólifað þegar hann ákvað árið 2018 að styrkja SOS Barnaþorpin um 10 milljónir króna. Jón lést í janúar 2019 og skilur eftir sig þá arfleifð að hafa tryggt fyrrverandi syrktarbörnum sínum örugga framtíð.

Systkini sem ólust upp í SOS barnaþorpinu í Santa Maria í Brasilíu fara fögrum orðum um SOS-styrktarforeldri sitt, Jón Pétursson, í minningargrein sem birt var á heimasíðu SOS í Brasilíu. Jón varð styrktarforeldri þeirra árið 1991 þegar þau voru tveggja og fimm ára.

Var okkur raunverulega sem faðir

Þetta var upphafið á fallegu sambandi milli Jóns og systkinanna sem nefndu hann Pétur frænda, (Uncle Peter) og heimsótti hann þau margoft til Brasilíu. „Ég minnist þess þegar mér var sagt að hann hafi valið að styrkja okkur eftir að hafa séð myndir af okkur. Honum þótti strax vænt um okkur og tók okkur að sér sem guðfaðir," segir systirin Graciane sem er 31 árs í dag og á tvö börn með sambýlismanni sínum, fjögurra og níu ára.

Bróðir Graciane er Leomar sem í dag er 34 ára og hefur einnig komið sér upp fjölskyldu. Leomar á fjögurra ára son með sambýliskonu sinni og hugsar alltaf hlýlega til Jóns. „Frá því hann hitti okkur í fyrsta skipti sýndi hann okkur umhyggju og athygli. Hann var okkur raunverulega sem faðir."

Graciane og Jón

Segja börnum sínum sögur af Jóni

Graciane og Leomar segja börnunum sínum reglulega sögur af Jóni sem þau segja að hafi kennt sér ýsmislegt. Meðal annars að útbúa íslenska matarrétti. Jón var viðstaddur margar gleðistundir í lífi barnanna í þorpinu í Santa Maria eins og skólaútskriftir. Hann var dýrkaður og dáður af börnunum og starfsfólkinu í Santa Maria barnaþorpinu og er enn þann dag í dag. Hann var staddur þar á 72 ára afmælisdaginn sinn árið 2006 og sungu börnin þá fyrir hann afsmælissönginn og bökuð var afmælisterta.

Veisla var haldin fyrir Jón í barnaþorpinu á 72 ára aafmælisdag hans

Tryggði framtíðaröryggi systkinanna

Jón var svo sannarlega með hjartað á réttum stað. Hann lét sig alltaf varða hag umkomulausra barna og styrkti alls átta börn í Brasilíu gegnum SOS Barnaþorpin. Árið 2018 hafði Jón samband við skrifstofu SOS á Íslandi og var heilsu hans þá farið að hraka.

Engu líkara er en að hann hafi vitað að hann ætti skammt eftir ólifað. Hann hafði ákveðið að gefa 10 milljóna króna framlag sem skiptist þannig að þrjár milljónir fóru til SOS á Íslandi, þrjár milljónir til barnaþorpsins í Santa Maria og svo gaf hann Graciane og Leomar sínar hvorar tvær milljónirnar svo þau gætu m.a. tryggt sér og fjölskyldum sínum öruggt húsnæði.

Graciane, sambýlismaður hennar, sonur og Leomar - Júní 2018

Ræddi við systkinin skömmu fyrir andlátið

Jón fékk hjartnæmt bréf frá Graciane, Leomar og börnunum í barnaþorpinu um sumarið 2018. Þau tjáðu honum væntumþykju sína og lýstu áhyggjum sínum af heilsufari hans með von um bata. Í janúar 2019 kom Jón á skrifstofu SOS í Hamraborg og átti myndsímtal við Graciane, Leomar, framkvæmdastjóra barnaþorpsins í Santa Maria og eiginkonu hans en þau voru nánir vinir Jóns. Tár féllu og það var greinilegt hve vænt Jóni þótti um börnin sín og þeim um hann. Jón lést nokkrum dögum síðar á dvalar- og hjúkrunarheimilinu Grund.

Jóns minnst í Brasilíu

Í minningarorðum á heimasíðu SOS Barnaþorpanna í Brasilíu segir að fjarlægð, menningarmunur og landamæri hafi ekki verið nein hindrun fyrir Jón í að sýna væntumþykju sína og stuðning við umkomulaus börnin í Brasilíu og hjálpa við að veita þeim tækifæri í lífinu.

„SOS Barnaþorpin í Brasilíu heiðra þá ást og samstöðu sem Jón sýndi okkur og þakka honum stuðninginn öll þessi ár."

Hér má lesa tvö viðtöl sem Jón veitti fréttablaði SOS Barnaþorpanna á Íslandi.

Viðtal við Jón frá því skömmu fyrir andlát hans: „Þetta er svo gefandi."

Viðtal við Jón í 1. tbl. fréttablaðs SOS árið 2007: Heimsótti börnin til Brasilíu (pdf)

Graciane og Leomar - júní 2018

Nýlegar fréttir

Fjögurra milljóna króna erfðagjöf til SOS
04.02.2021 Erfðagjafir

Fjögurra milljóna króna erfðagjöf til SOS

SOS Barnaþorpunum á Íslandi barst á dögunum rausnarleg erfðagjöf frá Svanhildi Jónsdóttur upp á tæpar fjórar milljónir króna. Svanhildur studdi allt sitt líf þá sem þurftu á stuðningi að halda og var ...

Ráðlagt að senda ekki bréf eða pakka til barnanna
01.02.2021 Almennar fréttir

Ráðlagt að senda ekki bréf eða pakka til barnanna

SOS Barnaþorpin réðleggja styrktarforeldrum eindregið frá því að senda styrktarbörnum sínum bréf eða pakka um þessar mundir. Ekki er hægt að tryggja að þessar sendingar komist á leiðarenda vegna ástan...