Fréttayfirlit 12. október 2016

Matthew á Haítí – mikil þörf á aðstoð

Að minnsta kosti 25% af landsvæði Haítí og um 12% þjóðarinnar hafa orðið fyrir áhrifum frá fellibylnum Matthew. Fellibylurinn skall á landinu þann 4. október og olli miklum flóðum og skemmdum.  Samkvæmt upplýsingum frá ACAPS* er um ein og hálf milljón manns í þörf fyrir mannúðaraðstoð og þar af eru 750.000 taldir vera í verulegri hættu. Að minnsta kosti 61 þúsund hafa þurft að flýja heimili sín og búa nú í bráðabirgðahúsnæði á vegum yfirvalda. Þá hafa að minnsta kosti 1.000 látist af völdum fellibylsins.

Búist er við að þörf verði á meiri mannúðaraðstoð þegar langtímaáhrif fellibylsins láta á sér bera. Þá er helst litið til kólerufaraldurs sem vaxið hefur í kjölfar bylsins og mikilla skemmda á landbúnaðarafurðum sem mun skapa langtímavandamál er snúa að fæðuöryggi og lífsgæðum.

Hvað gera SOS Barnaþorpin?

SOS Barnaþorpin reka þrjú barnaþorp í landinu. Áður en fellibylurinn skall á Haítí voru varúðarráðstafanir gerðar og nú hafa SOS sett aðgerðir í gang til að draga úr neyð þeirra sem hafa orðið fyrir miklum áhrifum af hamförunum. Engin slys urðu á börnum og starfsfólki á vegum SOS af völdum fellibylsins en skemmdir urðu á heimilum og skólum. Þetta undirbúa SOS í Haítí þessa stundina:

  • Mat, hreinu vatni, hreinlætisvörum og öðrum nauðsynjum verður dreift til fjölskyldna í neyð.
  • Barnvæn svæði verða opnuð og þar verður heitur hádegismatur framreiddur fyrir börn á aldrinum 3-5 ára.
  • Endurbyggingar og lagfæringar á skólum, barnaþorpum og öðrum svæðum SOS Barnaþorpanna sem urðu fyrir skemmdum af völdum fellibylsins. Einnig verða skemmdir á almenningsskólum sem SOS byggðu í kjölfar jarðskjálftans árið 2010 lagaðar.

Hægt er að styðja við neyðaraðstoð á Haítí með því að leggja frjálst framlag inn á reikning 334-26-52075, kt. 500289-2529 með skýringunni Haítí.

 

*ACAPS er skammstöfun fyrir Assessment Capacities Project sem starfar við að afla upplýsinga um aðstæður í neyðarástandi. 

Nýlegar fréttir

Ekkert mannfall eða skemmdir hjá SOS í Sýrlandi
6. feb. 2023 Almennar fréttir

Ekkert mannfall eða skemmdir hjá SOS í Sýrlandi

Staðfest hefur verið að öll börn, fjölskyldur og starfsfólk á vegum SOS Barnaþorpanna í Sýrlandi eru heil á húfi eftir mannskæðan jarðskjálfta sem reið yfir norðurhluta Sýrlands og suðurhluta Tyrkland...

Rúrik sigraði aftur í Let´s dance og gaf verðlaunaféð til SOS
26. jan. 2023 Almennar fréttir

Rúrik sigraði aftur í Let´s dance og gaf verðlaunaféð til SOS

SOS Barnaþorpunum barst í vikunni styrkur upp á rúma eina og hálfa milljón króna vegna sigurs Rúriks Gíslasonar í jólaþætti þýsku sjónvarpsþáttaraðarinnar Let´s dance.