Fréttayfirlit 25. október 2018

Hagyrðingakvöld til styrktar SOS

Það kom til tals hjá okkur í sumar að halda fjáröflunarviðburð af einhverju tagi fyrir samtökin og þegar hugmynd um hagyrðingakvöld var nefnd féll hún strax vel í kramið. SOS Barnaþorpin eiga velgjörðarmenn víða, meðal annars í hagyrðingasamfélaginu og því reyndust hæg heimatökin. Hagyrðingasamkomur eru hin mesta skemmtun og eru oftast nær mjög vel sóttar á landsbyggðinni en lítið hefur verið um slíkar samkomur á höfuðborgarsvæðinu.

Nú efna SOS Barnaþorpin til hagyrðingakvölds í Fáksheimilinu í Víðidal, fimmtudagskvöldið 8. nóvember klukkan 20:00. Við höfum fengið til liðs við okkur hóp valinkunnra og þekktra hagyrðinga til að yrkjast á um málefni líðandi stundar og kitla hláturtaugar áhorfenda. Ómar Ragnarsson, Kristján Hreinsson, Ólína Þorvarðardóttir, Sigurlín Hermannsdóttir og Sigurlína Davíðsdóttir sitja á pallinum. Annar kunnur hagyrðingur, Ragnar Ingi Aðalsteinsson, heldur svo um stjórnartaumana og allt er til staðar svo úr geti orðið stórskemmtileg kvöldstund í Víðidalnum fimmtudagskvöldið 8. nóvember næstkomandi.

Við stillum verðinu í hóf, það kostar aðeins 1500 krónur inn á viðburðinn og innifalið í verðinu er kaffi, kleinur og jafnvel flatkökur með hangikjöti. Þetta er þó eftir allt saman fjáröflunarviðburður og viðstaddir geta greitt frjálst framlag fyrir að panta vísu hjá hagyrðingunum.

Vonandi sjáum við ykkur sem flest á hagyrðingakvöldinu í Fáksheimilinu 8. nóvember.

Skráning er á Facebooksíðu viðburðarins.

Nýlegar fréttir

Söfnuðu rúmlega milljón fyrir börn í neyð á Gaza
10. jún. 2024 Almennar fréttir

Söfnuðu rúmlega milljón fyrir börn í neyð á Gaza

Nemendur Kársnesskóla héldu sinn árlega góðgerðardag nú á dögunum þar sem þeir söfnuðu rúmlega milljón fyrir börn í neyð á Gaza. Nemendur og starfsfólk skólans höfðu undirbúið daginn vel og buðu upp á...

Börn og starfsfólk yfirgefa SOS barnaþorpið í Rafah
30. maí 2024 Almennar fréttir

Börn og starfsfólk yfirgefa SOS barnaþorpið í Rafah

Þann 28. maí hófu SOS Barnaþorpin flutning barna og fullorðinna frá barnaþorpinu í Rafah vegna stóraukinnar öryggisáhættu á staðnum þar sem barnaþorpið er.