Telja um 15 þúsund börn hjálparþurfi í Palu

SOS Barnaþorpin í Indónesíu hafa sent hóp af sérfræðingum til borgarinnar Palu þar sem áætlað er að um fimmtán þúsund börn séu á vergangi og hjálparþurfi eftir flóðbylgjuna sem skall á borginni í lok september. Um tvö þúsund hafa fundist látnir og tala látinna hækkar með hverjum degi. Yfir sjötíu þúsund manns misstu heimili sín í hamförunum og í fréttatilkynningu frá SOS í Indónesíu segir að áætlað sé að þriðjungur þeirra séu börn.

„Hingað til hefur hjálparstarf aðallega verið í höndum yfirvalda en nú er tími til kominn að barnaverndarsamtök eins og við stigi inn og aðstoði yfirvöld. Þarna er stöðug neyð og hjálparstarfsfólk er loksins að komast að þeim svæðum sem verst urðu úti.“ segir Gregor Hadi Nitihardjo, framkvæmdastjóri SOS Barnaþorpanna í Indónesíu.

Tekur tvo daga að komast á staðinn

Nitihardjo býst við að það muni taka SOS-teymið minnst tvo daga að komast á svæðið. „Hjálparstarf okkar miðar að því að meta þörf barnanna fyrir sálfræðihjálp, að sameina þau foreldrum eða ættingjum og setja upp barnagæslu. Með barnagæslunni getum við veitt börnunum umönnun og vernd en börn eru sérstaklega berskjölduð við svona kringumstæður. Þau munu þurfa hjálp í marga mánuði í viðbót.“ segir Nitihardjo.

Átta SOS barnaþorp eru í Indónesíu en ekkert þeirra er nálægt hamfarasvæðum. 106 Íslendingar eru styrktarforeldrar barna í fimm af þessum þorpum.