SOS Barnaþorpin endurheimta börn frá Rússlandi

Serhii Lukashov, framkvæmdastjóri SOS Barnaþorpanna í Úkraínu, segir að það verði að reyna allt til að endurheimta þau börn sem rússnesk yfirvöld hafa brottnumið ólöglega yfir landamærin og aðskilið frá foreldrum sínum í Úkraínu. Hann segir að nú þegar hafi SOS Barnaþorpunum tekist að endurheimta 84 börn frá Rússlandi í samvinnu við samstarfsaðila.

„SOS Barnaþorpin eru ein af aðeins þremur starfandi hjálparsamtökum hér. Þetta er stórt og flókið verkefni. Samtals hefur tekist að endurheimta 385 börn til baka og 84 þeirra af SOS Barnaþorpunum,“ segir Lukashov í þýskum fjölmiðlum.

Yfir 19 þúsund börn hafa verið numin á brott síðan innrás Rússa hófst í fyrra. „Þetta eru stríðslæpir og, samkvæmt alþjóðalögum, hluti af þjóðarmorði,“ segir Lukashov.

SOS hjálpar foreldrunum að ná börnunum

Oft eru það börnin sjálf, þau á unglingsaldri, sem bera sig eftir aðstoð, t.d. í gegnum samfélagsmiðla. „Það eru aðeins foreldrarnir sjálfir sem eiga tækifæri á að ná börnunum til baka. Við hjálpum þeim að undirbúa aðferðirnar, veitum þeim fjárhagslegan stuðning og leiðbeinum þeim með nákvæmt orðlag til að nota í samskiptum við yfirvöld á landamærum,“ segir Lukashov.

Yfir 6 þúsund börn hafa misst foreldraumsjón

Yfir sjö milljónir barna búa í Úkraínu og líða fyrir innrás Rússa. Yfir 6 þúsund börn hafa misst foreldraumsjón sína síðan innrásin hófst og hefur starfsemi SOS Barnaþorpanna verið efld til muna í landinu. „Þetta er mesta umfang barnahörmunga sem við höfum upplifað í okkar starfi,“ segir Darya Kasyanova, verkefnisstjóri hjá SOS Barnaþorpunum í Úkraínu.

Fyrir innrás Rússa voru um eitt þúsund börn undir eftirliti eða í umsjá SOS Barnaþorpanna í Úkraínu. Nú eru þau yfir 25 þúsund. SOS Barnaþorpin á Íslandi ákváðu í mars sl. að bjóða Íslendingum að gerast mánaðarlegir styrktaraðilar fyrir SOS í Úkraínu.

Sjá einnig:

• Þörf á auknum stuðningi við SOS í Úkraínu
• Svona nýtist framlag þitt í Úkraínu