Lopapeysurnar afhentar í Rúmeníu

Börnin, ungmennin, starfsfólkið og SOS mömmurnar í SOS barnaþorpinu í Hemeius í Rúmeníu réðu sér vart fyrir kæti þegar þau fengu afar veglega gjöf frá Íslandi nú skömmu fyrir jól. 57 lopapeysur sem Guðrún Kristinsdóttir á Húsavík prjónaði fyrir alla í barnaþorpinu voru afhendar með viðhöfn á ungmennaheimili barnaþorpsins.
Ungmennin opnuðu kassana með peysunum þar sem einnig blöstu við myndabók um Húsavík og nágrenni, bréf frá Guðrúnu og þvottaleiðbeiningar fyrir lopapeysurnar. Cosmina, SOS dóttir Guðrúnar, býr einnig á ungmennaheimilinu en hún gat ekki verið viðstödd úthlutunina vegna vinnu. Hún hefur nú fengið sína peysu afhenda og yngstu börnin líka.
SOS Barnaþorpin í Rúmeníu útveguðu SOS á Íslandi stærðarnúmer allra barna, ungmenna, SOS-mæðra og starfsfólks í barnaþorpinu og allir voru hæstánægðir. Fyrstu úthlutanirnar fóru fram á tveimur heimilinum á ungmennasvæðinu og eru meðfylgjandi myndir þaðan. Þegar allir voru komnir í peysur fóru ungmennin út í garð að skreyta jólatré og daginn eftir var farið í peysunum á skautasvell.
Ungmennin eru nýflutt í nýtt húsnæði í borginni Bacau skammt frá þar sem aðstæður eru mun betri en á gamla staðnum. Á ungmennaheimilinu búa táningar sem hafa alist upp í barnaþorpinu en eru nú að búa sig undir fullorðinsárin og að standa á eigin fótum. Þau fá aukna ábyrgð og hugsa meira um sig sjálf.
SOS Barnaþorpin vilja færa DHL á Íslandi innilegar þakkir fyrir að veita samtökunum ríflegan afslátt af sendingargjaldinu fyrir lopapeysurnar.
Fjallað var um afhendinguna í fréttum Ríkissjónvarpsins.




Nýlegar fréttir

Sumarbúðir fyrir stríðshrjáð börn í Úkraínu
SOS Barnaþorpin fjármagna fjölmörg umbóta- og mannúðarverkefni í þágu velfarðar barna og ungmenna víða um heim með stuðningi Íslendinga. Nú í september lauk vel heppnuðum sumarbúðum í Úkraínu fyr...

Svör við algengum spurningum styrktaraðila vegna Gaza
Íslenskir styrktaraðilar vilja eðlilega vita hvort og hvernig framlög þeirra eru að nýtast í þeim aðstæðum sem ríkja á Gaza. Að venju viljum við halda Íslendingum upplýstum um nýtingu á framlögum þeir...