Ungmenni gefa af sér til eldri borgara

Mjög algengt er víða um heim hjá fólki sem ólst upp í SOS barnaþorpum að sýna þakklæti sitt í verki á einhvern hátt eftir að það flytur á brott og fer að standa á eigin fótum. Við höfum dæmi frá Indlandi þar sem fyrrverandi SOS börn hittast reglulega og safna fyrir einhverju sem barnaþorpið þeirra vantar. Þetta er meðal þess sem fram kom í frásögn Sonam Gangsang í heimsókn hennar til Íslands.

Sjá einnig: Sjáðu Evu Ruzu ræða við Sonam um árin í SOS barna­þorpi

Persónuleg umönnun

Hópur ungs fólks í Perú, sem allt ólst upp í SOS barnaþorpi, hefur stofnað sjálfboðaliðafélag til að bæta félagslegar aðstæður fyrir eldri borgara og láta gott af sér leiða. Tvisvar í mánuði mæta þau á lítið hjúkrunarheimili í Ayacucho, í samstæðum íþróttagöllum, með handklæði, sápu og skæri í töskunni.
Á heimilinu búa átta eldri borgarar og unga fólkið aðstoðar við persónulega umönnun til að bæta vellíðan íbúanna.

Spjallað og hlegið

Það er nuddað, þvegið og klipptar neglur – og það sem skiptir mestu máli: það er spjallað og hlegið. Sum ungmennanna taka eigin börn með sér því barnagæsla er ekki alltaf í boði. Börnin hlaupa um í garðinum og dreifa brosum á meðan „hreyfanlega snyrtistofan“ tekur á sig mynd með garðstólum og öðrum búnaði.

Heimsækja líka barnaheimili

Og þetta duglega unga fólk lætur ekki þar við sitja. Það heldur áfram að miðla umhyggju. Ungmennin heimsækja einnig barnaheimili í nágrenninu þar sem þau skipuleggja afþreyingu og skapa nánd fyrir börn sem, líkt og hinir öldnu, sakna fjölskyldu og stöðugra tengsla.

Markmið unga fólksins er einfalt en kröftugt: að leggja sitt af mörkum til samfélags með meira félagslegt jafnrétti þar sem allir fá sömu tækifæri.