Það sem áður virtist ómögulegt hefur orðið að veruleika

Þrátt fyrir að eiga gott ræktunarland lifði fjölskylda Aloys í sárri fátækt. Á heimilinu ríkti spenna og ágreiningur, og börnin urðu oft fórnarlömb aðstæðna. „Þrátt fyrir að við ættum land til ræktunar bjuggum við við mikla fátækt og glímdum við stöðugt hungur og matarskort,“ segir húsbóndinn Aloys. „Börnin okkar gátu ekki sótt skóla, þó að það sé grundvallarréttur þeirra.“

Bjuggu öll átta í einu herbergi

Aloys og eiginkona hans, Annonciatha, búa í Nyamiyaga-héraði í Rúanda ásamt sex börnum sínum, fimm sonum og einni dóttur. Fjölskyldan lifði af smáverkum og lítils háttar ræktun, en tekjurnar dugðu vart til framfærslu. „Ég veit ekki hversu oft börnin fóru svöng að sofa,“ segir hann. „Við bjuggum öll í einu herbergi og höfðum ekki efni á að kaupa neitt búfé.“

Í maí 2022 breyttist allt þegar fjölskyldan komst í fjölskyldueflingu SOS Barnaþorpanna, sem styrkt er af Íslendingum. Með stuðningi verkefnisins tóku Aloys og Annonciatha þátt í fjölmörgum námskeiðum sem beindust að fjármálum, uppeldi og samvinnu innan heimilisins. Þau gengu í sparnaðar- og lánasamtök á vegum verkefnisins og hófu að leggja smáar upphæðir fyrir. Þetta voru fyrstu skrefin í átt að stöðugleika og sjálfstæði.

Rúrik heimsótti fjölskylduna

Fyrr á þessu ári fór Rúrik Gíslason, velgjörðasendiherra SOS á Íslandi, til Rúanda að kynna sér þessa fjölskyldueflingu SOS sem hefur breytt lífi svo margra fjölskyldna til hins betra. Tilefni heimsóknarinnar var upptaka á sjónvarpsþætti um verkefnið sem sýndur verður á RÚV. Hjónin Aloys og Annonciatha tóku vel á móti Rúrik og sýndu honum með miklu stolti þann mikla árangur sem þau hafa náð.

„Við áttum ekki bara við fjárskort að stríða heldur þurftum við líka að breyta hugarfarinu,“ segir Aloys. „Verkefnið hjálpaði okkur að sjá að við gætum byggt upp betra líf ef við ynnum saman.“

Byggðu nýtt rúmgott hús

Smám saman fór lífið að breytast. Fjölskyldan lærði að skipta ábyrgðinni jafnt á heimilinu, og friður færðist inn í húsið. Hjónin fóru að rækta meira land og stofnuðu lítið fyrirtæki þar sem þau kaupa og selja húsdýr. Þau fengu svo lán í gegnum lánastofnun á vegum fjölskyldueflingar SOS sem þau nýttu til að byggja nýtt, rúmgott hús fyrir fjölskylduna.

Lífið hefur tekið miklum framförum. Börnin fá nú næringarríkan mat daglega, öll sækja þau skóla og standa sig vel. Fjölskylduna dreymir nú um að verða sjálfbær og velmegandi. „Við erum stolt,“ segir Annonciatha brosandi. „Við erum orðin sterkari saman og börnin okkar eiga framtíð.“

Stuðningurinn heldur áfram að skila árangri

Rúanda er þekkt fyrir bratt, hæðótt landslag sem íbúar handmoka í og búa til rásir fyrir ræktun sem taka á móti regnvatni. Fjölskyldan fékk tækifæri til að vinna við gerð varnargarða á landi sínu og fékk laun fyrir vinnuna. Þau notuðu tekjurnar til að kaupa sex geitur og fjórar hænur, auk þess sem þau fengu gæðafræ sem bættu uppskeruna og næringu fjölskyldunnar til muna. Verkefnið útvegaði þeim einnig kú, sem gefur bæði mjólk og lífrænan áburð og hefur þannig aukið uppskeru og tekjur.

Eitt barnanna fékk tækifæri til að sækja iðnnám í vélvirkjun með stuðningi verkefnisins og starfar nú á verkstæði í nágrenninu. Það er uppspretta stolts og vonar fyrir alla fjölskylduna. Aloys horfir bjartsýnn til framtíðar. „Við höfum lært að vinna saman og að hugsa öðruvísi,“ segir hann. „Það sem áður virtist ómögulegt hefur orðið að veruleika. Nú eigum við von.“

Að koma í veg fyrir að börn verði foreldralaus

Frá árinu 1949 hafa SOS Barnaþorpin veitt munaðarlausum börnum heimili og fjölskyldu í barnaþorpum og í annarri umönnun. Undanfarin ár hefur fjölskylduefling verið sá angi starfsemi SOS Barnaþorpanna sem vaxið hefur hvað hraðast. Fjölskylduefling er forvarnarverkefni sem ræðst gegn sárafátækt og kemur í veg fyrir að barnafjölskyldur sundrist og að börn verði foreldralaus.

Árið 2024 náðu alls 747 verkefni í fjölskyldueflingu SOS til 526.400 einstaklinga, þ.e. barna, ungmenna og foreldra þeirra. SOS Barnaþorpin á Íslandi fjármagna fjölskyldueflingu í fjórum löndum með stuðningi SOS fjölskylduvina. Í Rúanda, Malaví, Eþíópíu og Úganda. Utanríkisráðuneytið leggur til stóran hluta fjármögnunarinnar og er það liður í opinberri þróunarsamvinnu Íslands.