Þrjár heimilislausar fjölskyldur fengu hús frá SOS
![Þrjár heimilislausar fjölskyldur fengu hús frá SOS](/media/ir2ld1gq/project-staff-handing-over-keys.jpg?width=1150&height=600&mode=crop&anchor=top)
SOS Barnaþorpin í Malaví afhentu á dögunum þrjú nýleg hús til heimilislausra fjölskyldna. Þessar þrjár fjölskyldur eru í fjölskyldueflingunni í Ngabu sem er fjármögnuð af SOS á Íslandi með stuðningi SOS-fjölskylduvina og Utanríkisráðuneytinu.
Tákn um von og stöðugleika
Afhending húsanna var tilfinningaþrungin en hátíðleg. Fjölskyldurnar lýstu miklu þakklæti fyrir stuðninginn og að þessi mannvirki séu tákn um von og stöðugleika í lífi þeirra. Þessar fjölskyldur hafa ekki aðeins búið við sárafátækt heldur einnig misst húsnæði sín í náttúruhamförum eða af öðrum ástæðum.
Fyrr á þessu ári gekk fellibylurinn Freddy yfir svæðið með skelfilegum afleiðingum og olli m.a. mikilli eyðileggingu á verkefnasvæði okkar. SOS á Íslandi sendi í kjölfarið þriggja milljóna króna viðbótarfjármagn til verkefnis okkar í Malaví vegna hamfaranna.
Sjá einnig: Mikil eyðilegging og tjón á íslensku verkefnissvæði í Malaví
![Sam og systkini hans fyrir framan nýja húsið sitt.](/media/hsmnqab1/sam-chaponda-and-his-siblings-at-their-new-house.jpg?width=800)
![Svona lítur gamla húsið þeirra út sem skemmdist í hamförunum.](/media/pdkfjhz2/old-damaged-house-for-sam-chaponda.jpg?width=800)
Verkefni Íslands nær til yfir 15 þúsund barna
Íslenska fjölskyldueflingin í Ngabu nær beint til 1500 barna og ungmenna í 400 fjölskyldum sem fá ekki grunnþörfum sínum mætt vegna bágra aðstæðna foreldra þeirra eða forráðamanna. Í fjölskyldueflingu SOS tökum við fyrstu skrefin með fjölskyldum út úr sárafátækt svo þær getið staðið á eigin fótum og veitt börnunum bjarta framtíð.
15 þúsund skólabörn af 500 heimilum njóta einnig óbeint góðs af verkefninu sem styður við afar veikbyggða innviði samfélagsins.
Verkefni okkar í Ngabu er fjármagnað að stærstum hluta af Utanríkisráðuneytinu en einnig SOS-fjölskylduvinun, mánaðarlegum styrktaraðilum.
SOS fjölskylduvinur
Gerast SOS fjölskylduvinur
![SOS fjölskylduvinur](/media/ppqhoxn3/hlutlaus_ethiopia.jpg?width=410&height=200&mode=crop)
SOS-fjölskylduvinir styrkja fjölskyldueflingu SOS. Sem SOS-fjölskylduvinur kemurðu í veg fyrir að börn verði vanrækt og yfirgefin. Í fjölskyldueflingu SOS tökum við fyrstu skrefin með fjölskyldum út úr sárafátækt svo þær getið staðið á eigin fótum og veitt börnunum bjarta framtíð. Þú ákveður styrktarupphæðina og færð reglulega uppýsingapóst um verkefnin sem við fjármögnum.