360 barnafjölskyldur í Eþíópíu lausar úr viðjum sárafátæktar
Þau tímamót urðu nú um áramótin að verkefnalok urðu í Tulu-Moye fjölskyldueflingu okkar í Eþíópíu sem hófst árið 2018. Árangurinn var framar vonum á þessum fimm árum og tókst að losa 360 barnafjölskyldur úr viðjum sárafátæktar, alls 1130 börn og ungmenni auk foreldra þeirra.
Við tókum fyrstu skrefin með þessum fjölskyldum út úr sárafátækt með þeim eflandi aðferðum sem hafa reynst vel í sambærilegum verkefnum víða um heim. Foreldrarnir í þessum fjölskyldum eru nú farnir að afla tekna sem þeir gerðu ekki áður, standa á eigin fótum og geta veitt börnunum bjarta framtíð.
Tulu-Moye fjölskyldueflingin var starfrækt í smábænum Iteya sem liggur við þjóðveg en náði einnig til fjölskyldna í Tero Moye sem er sveit í nágrenninu.
Zemzen ásamt eiginmanni sínum og börnum. Zemzen rekur smáverslun og hefur af því tekjur f yrir fjölskylduna.
Verkefnið framlengt eftir Covid
Alls 560 fjölskyldur voru skráðar í upphafi verkefnisins og stóðu vonir til um að hægt yrði að útskrifa helming þeirra á verkefnatímanum sem upphaflega var til þriggja ára. Hins vegar setti kórónuveirufaraldurinn stórt strik í reininginn og var ákveðið að framlengja verkefnið um tvö ár eða út árið 2023.
Framlengingin gerði gæfumuninn og fyrir vikið tókst að rjúfa vítahring fátæktar hjá 64% þeirra fjölskyldna sem hófu þátttöku í verkefninu. „Þessi árangur er talsvert meiri en í öðrum verkefnum okkar í fjölskyldueflingu,“ segir Tadesse Abebe hjá SOS Barnaþorpunum í Eþíópíu.
Kostnaður við Tulu-Moye fjölskyldueflinguna er að stærstum hluta fjármagnaður af utanríkisráðuneytinu. Framlögum SOS-fjölskylduvina er einnig varið í fjármögnun verkefna okkar í fjölskyldueflingu. SOS á Íslandi fjármagnar einnig slík verkefni í Malaví og Rúanda.
ATH! Ranglega var sagt í frétt okkar í júní 2023 að 560 fjölskyldur hefðu útskrifast úr fjölskyldueflingunni. Það hefur nú verið leiðrétt.
Hanna er 29 ára einstæð tveggja barna móðir. Hún rekur ásamt tveimur öðrum mæðrum smásjoppu og salarnisaðstöðu á umferðarmiðstöð bæjarins Iteya.
Önnur fjölskylduefling í Eþíópíu
Við látum ekki deigan síga og höldum áfram vegferð okkar í að taka fyrstu skrefin með barnafjölskyldum út úr sárafátækt. Vinna er hafin við annað verkefni í Arba Minch sem er í sunnanverðri Eþíópíu. Þar munum við styðja við 635 börn og foreldra þeirra eða forrráðafólk og mun fjölskyldueflingin þar hafa óbein jákvæð áhrif á 11 þúsund íbúa á svæðinu.
Verkefnið er til þriggja ára og er áætlaður kostnaður þess rúmar 90 milljónir króna. Sem fyrr verður stærstur hluti hans fjármagnaður af utanríkisráðuneytinu auk framlaga SOS-fjölskylduvina.
Hans Steinar upplýsingafulltrúi ásamt starfsfólki verkefnisins í Iteya.
Heimildamyndin „Föst í fátækt“
Árið 2017 framleiddu SOS Barnaþorpin heimildamynd um fjölskyldueflinguna í Tulu-Moye. Myndin færir okkur innsýn í líf fólksins í Iteya og Tero-Moye og er hægt að sjá hana á YouTube rás okkar.
SOS fjölskylduvinur
Gerast SOS fjölskylduvinur
Sem SOS-fjölskylduvinur kemurðu í veg fyrir að börn verði vanrækt og yfirgefin. Í fjölskyldueflingu SOS tökum við fyrstu skrefin með fjölskyldum út úr sárafátækt svo þær getið staðið á eigin fótum og veitt börnunum bjarta framtíð. Þú ákveður styrktarupphæðina og færð reglulega uppýsingapóst um verkefnin sem við fjármögnum.