Utanríkisráðherra gerði rammasamning við SOS
Þorgerður Katrín Gunnarsdóttir utanríkisráðherra skrifaði á mánudaginn undir rammasamning við SOS Barnaþorpin til fjögurra ára. Framlög ráðuneytisins til SOS á þessu tímabili nema samtals 689 milljónum króna og verður þeim varið í þróunarsamvinnuverkefni, mannúðaraðstoð og kynningar- og fræðsluverkefni.
Samningurinn kveður jafnframt á um mótframlag í hvert verkefni frá SOS Barnaþorpunum á Íslandi. Verkefni SOS sem verða styrkt á þessu ári með þessum fjármunum eru fjölskylduefling í Malaví, Rúanda, Eþíópíu og Úganda auk verkefnis okkar sem vinnur gegn kynferðislegri misneytingu á börnum í Tógó. Einnig verður fjármunum varið í mannúðarverkefni SOS síðar á árinu.
SOS Barnaþorpin eru ein af fjórum félagasamtökum á Íslandi sem stóðust formkröfur fyrir rammasamningana. Hin samtökin eru Rauði krossinn, Hjálparstarf kirkjunnar og Barnaheill – Save the Children. Ragnar Schram framkvæmdastjóri skrifaði undir samninginn við utanríkisráðherra fyrir hönd SOS Barnaþorpanna.
Frá vinstri: Sólrún María Ólafsdóttir (RKÍ), Ósk Sturludóttir (UTN), Ragnar Schram (SOS Barnaþorpin), Kristín Ólafsdóttir (Hjálparstarf kirkjunnar), Bjarni Gíslason (Hjálparstarf kirkjunnar), Þorgerður Katrín Gunnarsdóttir (utanríkisráðherra), Tótla Sæmundsdóttir (Barnaheill), Silja Bára Ómarsdóttir (RKÍ), Kolbrún Pálsdóttir (Barnaheill), Pálína B. Matthíasdóttir (UTN), Gísli Rafn Ólafsson (RKÍ), Kolbeinn Arnarson (UTN). - Myndir: Utanríkisráðuneytið.
Til marks um traust og gott samstarf
Rammasamningar styrkja starf íslenskra félagasamtaka í þróunarsamvinnu og mannúðaraðstoð, auka fyrirsjáanleika og gera þeim kleift að skipuleggja starfið til lengri tíma. Samningarnir styðja við gildi íslenskrar þróunarsamvinnu: útrýmingu fátæktar, mannréttindi, jafnrétti kynjanna og aukið viðnámsþol samfélaga.
Þessir samningar eru til marks um það traust og góða samstarf sem utanríkisráðuneytið hefur átt við félagasamtök í þróunarsamvinnu. Það er í dag mikilvægara en nokkur sinni fyrr að við stöndum vörð um mannréttindi og okkar áherslur í þróunarsamvinnu. Því er svo mikilvægt að við vinnum saman og við sjáum fram á náið samstarf næstu fjögur árin. Þorgerður Katrín Gunnarsdóttir utanríkisráðherra
Sjá nánar á vef Utanríkisráðuneytisins.
Nýlegar fréttir
Ný fjölskylduefling í Malaví nær til 1200 barna í 300 fjölskyldum
Nú í vikunni hófst formlega nýtt verkefni í fjölskyldueflingu í Malaví sem er styrkt af Íslendingum með stuðningi SOS fjölskylduvina og Utanríkisráðuneytisins. Verkefnið er til þriggja ára og mun ná t...
Fjögur ár af stríði í Úkraínu: Börn bíða enn eftir öryggi og stöðugleika
Þegar Úkraína minnist fjögurra ára frá upphafi allsherjarinnrásar Rússa halda börn víðs vegar um landið áfram að alast upp við loftárásarviðvaranir, flótta, rafmagnsleysi og óvissu um framtíðina. Fyri...