Fréttayfirlit 11. mars 2020

Kveðja vegna fráfalls eins af upphafsmönnum SOS á Íslandi



Garðar Ingvarsson var einn upphafsmanna að starfsemi SOS Barnaþorpanna á Íslandi fyrir rúmlega 30 árum síðan. Hann sat í stjórn samtakanna frá upphafi og studdi þau með ráðum og dáð alla tíð. Fyrir ekki svo löngu síðan ákvað Garðar að kominn væri tími til þess að stíga til hliðar og hleypa yngri kynslóðum að. Hann fór þó ekki langt, heldur tók samkvæmt boði þar um fúslega sæti í fulltrúaráði samtakanna og sat þar allt til dauðadags. 

Garðar mætti vel á alla fundi og samkomur sem komu starfsemi SOS Barnaþorpanna við og leit reglulega við á skrifstofu samtakanna, bæði til að greiða framlög og ekki síður til þess að spjalla við og hvetja starfsfólk. Hann var til dæmis búinn að boða komu sína á fund síðar í þessum mánuði, þrátt fyrir háan aldur og heilsubrest.

Sjálfur lagði hann mikið upp úr því að framlög hans væru ekki „eyrnamerkt“ einhverju sérstöku verkefni svo þau gætu nýst sem best til þess að mæta aðkallandi kostnaði við starfsemi samtakanna. Þá var hann ætíð duglegur að tala máli samtakanna á hverjum þeim vettvangi þar sem hann gat komið þessu hjartans máli sínu að og var ónískur á að veita góð ráð varðandi reksturinn og starfsemina alla.

Það reyndist SOS Barnaþorpunum mikill happafengur að hafa Garðar innanborðs og fyrir hönd allra þeirra munaðarlausu og yfirgefnu barna sem notið hafa stuðnings frá Íslandi í gegnum árin þökkum við honum kærlega fyrir stuðninginn og ánægjulega samfylgd. Fjölskyldu Garðars vottum við okkar dýpstu samúð. 

Starfsfólk og stjórn SOS Barnaþorpanna á Íslandi

Nýlegar fréttir

Sumarbúðir fyrir stríðshrjáð börn í Úkraínu
8. okt. 2025 Almennar fréttir

Sumarbúðir fyrir stríðshrjáð börn í Úkraínu

SOS Barna­þorp­in fjár­magna fjöl­mörg umbóta- og mannúðarverk­efni í þágu velfarðar barna og ungmenna víða um heim með stuðningi Íslendinga. Nú í september lauk vel heppnuðum sumarbúðum í Úkraínu fyr...

Svör við algengum spurningum styrktaraðila vegna Gaza
17. sep. 2025 Almennar fréttir

Svör við algengum spurningum styrktaraðila vegna Gaza

Íslenskir styrktaraðilar vilja eðlilega vita hvort og hvernig framlög þeirra eru að nýtast í þeim aðstæðum sem ríkja á Gaza. Að venju viljum við halda Íslendingum upplýstum um nýtingu á framlögum þeir...