Mamman yfirgaf dæturnar úti á götu
![Mamman yfirgaf dæturnar úti á götu](/media/2trk23qu/tanzania_cv_mwanza_dorothy_2.jpg?width=1150&height=600&mode=crop&anchor=top)
Systurnar Aisha og Wazo voru ráfandi einar um götur þegar þær fundust í Tansaníu. Stúlkurnar, fjögurra og fimm ára, voru aleinar því móðir þeirra hafði yfirgefið þær. Þegar þær voru spurðar hvar mamma þeirra væri gátu þær aðeins sagt að hún væri „langt í burtu". Þær vissu aðeins eigin fornöfn en ekki mömmu sinnar sem þær kölluðu sífellt á. En hún var hvergi nærri.
Systrunum var komið tímabundið fyrir á ríkisreknu munaðarleysingjaheimili en fljótlega fluttu þær í SOS barnaþorpið í Mwanza þar sem SOS-mamman Roselyn gekk þeim í móðurstað.
![Ásamt SOS mömmu sinni Roselyn. Wazo er vinstramegin og Aisha hægra megin en í miðjunni er Joshua, SOS bróðir systranna.](/media/5uzhvx2b/tanzania_cv_mwanza_dorothy_1.jpg?width=800)
Vannærðar þegar þær komu
„Enginn veit hvað þær höfðu verið lengi ráfandi einar um göturnar," segir Roselyn. „Það hafði augljóslega ekki verið hugsað vel um þær á munaðarleysingjaheimilinu því þær voru vannærðar og litlar í sér þegar þær komu hingað."
Systrunum gekk illa að aðlagast lífinu í barnaþorpinu fyrst um sinn. Þær þekktu ekki nýju SOS systkini sín og töluðu ekki Svahílí, opinbert tungumál Tansaníu.
„Ást er alþjóðlegt tungumál"
„Það var erfitt að eiga samskipti við stúlkurnar í fyrstu því þær töluðu ekki sama tungumál og við. Við gátum ekki skilið hvora aðra. Ég ákvað því í staðinn að sýna þeim mikla væntumþykju og náði þannig að búa til tengingu á milli okkar. Ást er alþjóðlegt tungumál sem allir skilja," segir SOS mamman Roselyn
![Wazo og Aisha njóta sín í leikskólanum.](/media/g11nlsom/tanzania_cv_mwanza_dorothy_3.jpg?width=800)
Urðu fljótt hamingjusamar
Það tók Aisha og Wazo aðeins einn mánuð að aðlagast nýju fjölskyldunni sinni og lífinu í barnaþorpinu. Þær byrjuðu fljótt að leika sér við SOS systkini sín og Roselyn tók eftir að þær voru orðnar hamingjusamar og fundu fyrir öryggi. Systurnar eru nú byrjaðar í skóla og ná betri tökum á tungumálinu með hverjum degi.
„Wazo er mjög fljót að læra nýju hluti. Hún er áhugasöm um landafræði og finnst skemmtilegt að sökkva sér í landakort og skoða bæi, borgir og svæði í Tansaníu. Systrunum gengur báðum vel í skóla. Aisha ætlar að verða kennari þegar hún verður stór en Wazo dreymir um að verða besta mamma í heimi," segir SOS mamman Roselyn með stolti.
![Wazo er áhugasöm um landafræði.](/media/qatlnt3y/tanzania_cv_mwanza_dorothy_4.jpg?width=800)
53 Íslendingar eru SOS-foreldrar barna í SOS barnaþorpinu í Mwanza. Þar búa 86 börn og ungmenni í 11 fjölskyldum.
Myndir og viðtal: Dorothy Ndege
SOS foreldri
Vertu SOS foreldri
![SOS foreldri](/media/orabl3fb/barnaþorp1.jpg?width=410&height=200&mode=crop)
SOS-foreldri tekur þátt í að framfleyta barni sem áður var umkomulaust og tryggir því fjölskyldu á góðu heimili. Barnið fær menntun og öllum grunnþörfum sínum mætt. Þú færð reglulega fréttir og myndir af SOS-barninu þínu.
Þegar þú velur að styrkja „öll börn“ styrkirðu öll börnin í einu SOS barnaþorpi og færð almennar fréttir úr tilteknu barnaþorpi.