Ágóði af sölu SOS bolsins afhentur
![](/media/5dfbozpy/sos-bolur-rúriks.jpg?width=410)
SOS Barnaþorpin á Íslandi hafa fengið afhentar 1,6 milljónir króna frá 66°Norður. Upphæðin er ágóði af sölu á SOS-bolnum sem hannaður var í samstarfi við Rúrik Gíslason, velgjörðarsendiherra SOS, og seldur var í verslunum 66°Norður í desember sl.
Þessi styrkur fer svo sannarlega á góðan stað því honum verður ráðstafað í þrjú verkefni sem SOS á Íslandi fjármagnar og snúa öll að velferð barna í erfiðum aðstæðum. Það eru Fjölskylduefling SOS í Eþíópíu og á Filippseyjum annars vegar og hins vegar verkefnið Gegn kynferðislegri misneytingu á börnum í Tógó.
„Það var ánægjulegt að geta lagt eitthvað að mörkum og frábært að bolurinn seldist upp hratt. Það var virkilega gefandi að taka þátt í þessu verkefni,“ segir Rúrik sem hefur verið velgjörðarsendiherra hjá SOS á Íslandi síðan 2018.
„Markmiðið okkar var að framleiða vandaða vöru og gefa Íslendingum tækifæri að styrkja gott málefni um leið. Við fengum einnig tækifæri að kynnast þeirra frábæra starfi í þágu ríflega milljón barna,“ segir Fannar Páll Aðalsteinsson, markaðsstjóri 66°Norður.
„Samstarfið við Rúrik og 66°Norður var til fyrirmyndar í alla staði. Afraksturinn af sölu bolsins mun sannarlega koma að góðum notum,“ segir Ragnar Schram, framkvæmdastjóri SOS Barnaþorpanna á Íslandi.
Fjölskylduefling SOS gengur út á að aðstoða sárafátækar barnafjölskyldur til sjálfbærni, gera þeim kleift að mæta grunnþörfum barna sinna og stuðla að menntun barnanna og foreldranna. Verkefnið í Eþíópíu stendur yfir í fjögur ár, frá 2018 og út árið 2021 og verkefnið á Filippseyjum er í þrjú ár, frá 2019 og út árið 2021.
Verkefnið í Tógó gegn kynferðislegri miseytingu á börnum hófst nú í janúar 2020 og stendur yfir í 3 ár. 56% stúlkna í Tógó eru fórnarlömb kynferðslegrar misneytingar og 17,3% stúlkna verða barnshafandi fyrir 18 ára aldur.
Nýlegar fréttir
![Börnin aftur í skóla eftir átta mánaða hlé vegna stríðsins](/media/fdcbxg4k/bethlehem_evacuated-children_lama-qattush_dsc_0299.jpg?width=410&height=300&mode=crop&bgcolor=ffffff)
Börnin aftur í skóla eftir átta mánaða hlé vegna stríðsins
Börnin 68 sem flutt voru frá SOS barnaþorpinu í Rafah á Gaza til barnaþorpsins í Bethlehem á Vesturbakkanum í mars sl. eru komin aftur í skóla. Vegna stríðsins féll skólaganga þeirra niður í átta mánu...
![Tveir Íslendingar mega styrkja sama barnið](/media/iszp3ngn/namibia-ondangwa-09-2022-1t9a7833_jpg.jpg?width=410&height=300&mode=crop&bgcolor=ffffff)
Tveir Íslendingar mega styrkja sama barnið
Vegna aukinnar þarfar á stuðningi við börn í SOS barnaþorpum hefur sú breyting nú tekið gildi að tveir Íslendingar mega styrkja sama barnið. Að meðaltali eru um fimm til sex SOS-foreldrar um hvert sty...