22.02 2019

Kalli bjargaði tvíburum sem áttu að deyja

Karl Jónas Gíslason var svo sannarlega réttur maður á réttum stað þegar hann var á ferð um Suður Ómó í Eþíópíu haustið 2012. Kalli var nýkominn þangað frá Íslandi þegar hann var búinn að bjarga nýfæddum tvíburabræðum frá því að vera bornir út eins og það er kallað hjá þjóðflokkum á svæðinu. Tvíburarnir áttu að deyja til að aflétta bölvun sem talin var fylgja þeim. Þeir búa í dag á öruggu heimili í SOS barnaþorpi í Hawassa í Eþíópíu.

Átakanlega frásögn Kalla má sjá í meðfylgjandi myndskeiði.

GERAST SOS-STYRKTARFORELDRI

Töldu bölvun hvíla á tvíburunumTvíburar Kalla_1.jpg

Móðir tvíburanna dó við fæðingu og faðirinn hafði verið myrtur nokkrum mánuðum áður. Þegar drengirnir fæddust var annar þeirra tileygður og þá var fjölskyldan endanlega sannfærð um að bölvun fylgdi strákunum. „Þá er aðferðin sú að börnin eru tekin og þau borin út á sléttuna þar sem þau eru skilin eftir og hýenurnar sjá um restina. Eða þá að þeim er fleygt í ána þar sem þau drukkna eða verða krókódílum að bráð,“ segir Kalli.

Amma strákanna bað Kalla um að bjarga þeim

Karl er fæddur og uppalinn í Eþíópíu fyrstu 9 ár ævi sinnar og fluttist þangað aftur síðar ásamt eiginkonu sinni. Þau bjuggu í fjögur ár í Omorate þar sem þau sinntu kirkjustarfi og lestrarkennslu til ársins 2011 þegar þau fluttu aftur heim til Íslands. Síðan hefur Kalli farið út einu sinni á ári til að fylgja þeim verkefnum eftir. Það var í slíkri ferð haustið 2012 sem amma tvíburanna nýfæddu kom að máli við Kalla og bað hann um að bjarga þeim.

„Þegar við komum sagði amma þeirra að annað hvort tæki ég strákana eða að þeir yrðu bornir út. Hvað á maður að gera? Við sóttum strákana því ég gat einhvern veginn ekki hugsað mér að láta strákana búa í þessari óvissu ef amma þeirra skyldi taka upp á að gera eitthvað.“

Amman myrt

Amma tvíburanna fór með Kalla til að hugsa um tvíburana meðan reynt var að koma þeim einhversstaðar fyrir. Hún gafst á endanum upp og lét sig hverfa en var myrt nóttina eftir að hún hvarf. „Þetta undirstrikaði fyrir þjóðflokkinn að bölvun hvíldi á drengjunum og í framhaldinu tókum við eftir því að það komu mjög fáir inn á lóðina til okkar. Fólk skildi ekki hvernig við þorðum að hafa þessa drengi hjá okkur. Ég sagði fólki bara að ég trúði ekki á þessa bölvun.“

Aðstoð frá SOS á ÍslandiTvíburar Kalla_2.jpg

Kalli kom strákunum tímabundið fyrir á heimavist stúlkna sem var á lóðinni hjá honum á meðan hann reyndi að finna framtíðarheimili fyrir þá. Þær tilraunir skiluðu engu en Facebook-færsla hans með ákalli um hjálp vakti athygli framkvæmdastjóra SOS Barnaþorpanna á Íslandi, Ragnars Schram. Hann hafði samband við SOS í Eþíópíu þar sem ákveðið var að koma tvíburunum í fóstur í SOS barnaþorpinu í Hawassa í Eþíópíu. Þar hafa þeir dafnað vel og búa ennþá í dag, á sjöunda aldursári, og eiga t.d. íslenska styrktarforeldra.

GERAST SOS-STYRKTARFORELDRI

Heimsækir tvíburana á hverju ári

Kalli gaf tvíburunum nöfnin Ísak og Samúel og fer hann áfram einu sinni á ári til Eþíópíu og heimsækir strákana í hvert sinn. Þeir eru meðvitaðir um að Kalli bjargaði lífi þeirra og taka honum fagnandi í hvert skipti sem hann heimsækir þá.

Það gekk hins vegar ekki þrautalaust fyrir Kalla að koma strákunum í umsjá SOS barnaþorpsins. Kalli segir mikla ómenningu ríkja í Suður Eþíópíu þar sem ólíkar hefðir og ólík trúarbrögð ríkja hjá þeim 18 áttbálkum sem þar eru.

Tilfinningaþrungna sögu Kalla um tvíburana má sjá og heyra í heild sinni í meðfylgjandi myndskeiði hér að ofan. Myndin hér að neðan er tekin af Ísaki og Samúel 2. febrúar sl. í SOS barnaþorpinu í Hawassa þar sem þeir lifa góðu lífi.

Tviburarnir.JPG