Dylan (5) lærir að hjóla

26.11.2009

Þetta byrjaði allt þegar Dylan litli sá reiðhjól bróður síns. Á því augnabliki var hann staðráðinn í að læra að hjóla. Hann gerði nokkrar tilraunir, en án árangurs. Hann langaði bara að læra að hjóla eins og stóru krakkarnir. Og einmitt þá birtist hjálpin, þegar hann þurfti mest á henni að halda.

Dylan er fimm ára og býr í SOS-barnaþorpinu í Lujan í Argentínu. Hans eina fjölskylda er SOS fjölskylda hans. Hann á enga aðra að.

Draumur Dylans um að læra að hjóla breyttist þó í martröð. Hann datt ítrekað af hjólinu og virtist ekki ætla að hafa erindi sem erfiði. En þá birtust tvær hetjur sem hjálpuðu honum: eldri bræður hans þeir Agustin (9) og Lautaro (7).

Fyrsta tilraunin gekk vægast sagt illa. Dylan náði ekki einu sinni að setjast á hnakkinn þar sem hjólið var nokkrum númerum of stórt fyrir hann. Þegar hann loks náði að setjast á hnakkinn náði hann varla niður á fótstigin. En Dylan var staðráðinn í að gefast ekki upp og það kom að því að hann náði að renna um einn metra á hjólinu.

En í kjölfar þess áfangasigurs fylgdu vonbrigði því Dylan missti jafnvægið og féll af hjólinu. Hann reiddist mjög og var að því kominn að fara að gráta því hann hafði meitt sig í fætinum en ákvað þess í stað að halda áfram. Og þá komu eldri bræður hans til sögunnar.

Þeir höfðu horft á Dylan detta af hjólinu og ákváðu að hjálpa honum. Fyrst kenndu þeir honum hvernig maður fer á hjólið. Það reyndist Dylan ekki auðvelt en með stóran bróður sér til sitthvorrar handar tókst honum að halda sér á hjólinu.

Drengirnir ýttu nú litla bróður sínum á hjólinu og fljótlega var nóg að annar þeirra væri til staðar. Dylan var farinn að halda jafnvægi og rann nokkra metra á hjólinu. Honum hafði tekist það! Bræður hans horfðu á hann renna sér á hjólinu og síðar hjóla stoltur um þorpið.

Nokkrir mánuðir eru liðnir frá því að Dylan lærði að hjóla og í dag finnst honum það ekkert mál. Hann á það til að efna til hjólreiðakeppni meðal barnanna í þorpinu og hann stendur þeim mörgum fyllilega á sporði þrátt fyrir ungan aldur.

Fjögur SOS-barnaþorp eru í Argentínu. Þorpið hans Dylan er í Lujan, skammt frá höfuðborginni Buenos Aires.