Götubetlari fær gott heimili

23.8.2011

Sumum börnum sem fæðast inn í þennan heim stendur ekki til boða gott heimili, ástríkir foreldrar og heilbrigt umhverfi til uppvaxtar. Daníel er einn þessara barna. Strax við fæðingu átti hann nánast enga von.

Daníel fæddist í Mekelle í Eþíópíu. Báðir foreldrar hans þjást af geðklofa og Daníel litli fékk ekki þá umhyggju sem hann þurfti. Móðir hans hafði eignast nokkur börn sem öll dóu  vegna vannæringar og skorts á heilbrigðisþjónustu.

Fyrstu daga ævi sinnar bjó Daníel litli á gangstétt nálægt kirkju heilagrar Maríu í Mekelle en fjölskyldan færði sig reglulega um set í borginni. Þau reistu sér einhvers konar hreysi úr „byggingarefni“ sem þau fundu á víðavangi; pappakössum, trjágreinum, plastábreiðum o.fl.

Dag einn kynntist móðir Daníels öðrum karlmanni sem einnig er geðklofi. Hún giftist honum líka og fjölskyldan stækkaði: Eitt lítið barn, tveir geðklofa karlar og ein geðklofa móðir. Öll drógu þau fram lífið með því að betla á götum úti og Daníel fékk grunnþörfum sínum hvergi nærri mætt.

Eitt sinn var fjölskyldan rekin á brott frá þeim stað sem þau höfðu komið sér fyrir á. Þau fluttu þá á gangstétt í nágrenni SOS Barnaþorpsins í Mekelle. Líf fjölskyldunnar var mjög erfitt en einkum þó fyrir Daníel. Hann var vannærður og illa leikinn af sólinni, hitanum, regninu og kuldanum.

Daníel var bara einn fjölmargra barna í þessum heimi sem var heimilislaus og fékk ekki grunnþörfum sínum mætt; ekki einu sinni þörfinni fyrir ástúð og umhyggju.

Starfsfólk SOS Barnaþorpsins tók eftir Daníel og hafði samband við yfirvöld. Í kjölfarið var Daníel boðið heimili í barnaþorpinu og fluttist þangað þann 30. júní 2010. Í dag er Daníel hraustur og kátur drengur. Hann fær andlegum, félagslegum og líkamlegum þörfum sínum mætt og skyndilega er tilveran farin að brosa við þessum litla fyrrverandi götubetlara.