Markmið SOS Barnaþorpanna

SOS Barnaþorpin hafa sett fram áætlun í átta liðum sem fylgt verður eftir með mismunandi áherslum eftir heimshlutum. Allir liðirnir hafa jafnt vægi í starfi SOS Barnaþorpanna:

---

1. Að vera frumkvöðlar í að veita langvarandi hjálp til nauðstaddra barna í fjölskylduvænu umhverfi

SOS Barnaþorpin voru stofnuð árið 1949 og hafa því áratuga reynslu í því að sjá börnum fyrir fjölskylduvænum uppeldisskilyrðum. Formið sem samtökin byggja á, hugmyndirnar fjórar frá Hermann Gmeiner um móður, systkini, heimili og samfélag, er það sem skilur SOS Barnaþorpin frá öðrum barnahjálparsamtökum. Sú staðreynd knýr samtökin til að vera leiðandi afl á heimsvísu í því að sjá börnunum fyrir góðum uppeldisaðstæðum innan fjölskyldueiningar. Til að ná markmiðum sínum verða samtökin að styrkja innviði þjónustunnar, víkka starfsemi barnaþorpanna sjálfra, miðla upplýsingum um starfsemi barnaþorpanna í hverju samfélagi og taka þátt í samstarfsneti við önnur samtök á sama vettvangi.

2. Berjast gegn því að börn séu yfirgefin

Að ná til fleiri barna þýðir þátttöku í umræðu um alþjóðleg málefni. Eitt slíkt málefni varðar sundraðar fjölskyldur og börn sem hafa verið yfirgefin af báðum foreldrum sínum. Fjölskyldur sem standa höllum fæti, félagslega og efnahagslega, eru sérstakt viðfangsefni SOS Barnaþorpanna. Með Fjölskyldueflingu SOS vilja samtökin sporna gegn þróun í þá átt að sífellt fleiri börn verði viðskila við fjölskyldur sínar. Til að ná markmiði yfirlýsingarinnar skal: Framkvæma samfélagsmiðaðar verndaraðgerðir, setja skýr markmið stoðstofnana samtakanna, koma af stað umræðugrundvelli innan allra stofnana og byggja upp sérfræðiþekkingu innan málefnisins hjá samtökunum.

3. Samvinna í fjáröflunarmálum - tekjur verði auknar um allan heim

Aðeins er hægt að hjálpa fleiri börnum með því að auka tekjur samtakanna. Byggja þarf upp árangursríkt fjáröflunar­ferli meðal landsdeildanna. Auka verður breidd þeirra aðferða sem notaðar eru við fjáröflun. Notast skal við alþjóðlegan ramma við fjáröflun og auka þarf samstarf milli landsfélaga, búa þarf til fjáröflunarmenningu byggða á fagmannlegum grunni og virða þarf sérfræðiþekkingu starfsfólks. Brunnur sérfræðiþekkingar og fjármagns skal vera opinn þeim landsfélögum sem á þurfa að halda og markaðslögmál í viðskiptaháttum skal notað til að ná til nýrra viðskiptavina og hæfs starfsfólks.

4. Alþjóðleg þátttaka og samstarf

Auka þarf samstarf við önnur frjáls félagasamtök, til dæmis innan Sameinuðu þjóðanna og Evrópusambandsins. Samvinna er mikilvæg til þess að læra, hafa áhrif á réttindi barna og auka vægi rannsókna í framtíðarþróun málaflokksins.

5. SOS-fjölskylduvæna uppeldisformið og staða SOS-móðurinnar njóti utanaðkomandi virðingar

Mikilvægt er að það uppeldisform sem SOS Barnaþorpin byggja á og staða SOS-móðurinnar verði kynnt og öðlist skilning og virðingu, auk lagalegs réttmætis, meðal yfirvalda um heim allan. Til þess að lagalegur grundvöllur verði alls staðar fyrir hendi er mikilvægt að starfsemi SOS Barnaþorpanna sé ekki líkt við umönnun barna á hæli eða á stofnunum. Auka þarf því áhersluna á fjölskyldumiðaða og langvarandi hjálp, þegar SOS Barnaþorpin eru kynnt til tvíhliða samstarfs.

6. Sterkar landsdeildir

Það hefur verið markmið SOS Barnaþorpanna frá upphafi að byggja upp öflugar landsdeildir. Sterkar rætur hjálpa börnunum að takast á við framtíðina þegar þau eru komin á unglingsár og flytja að heiman. Stjórn, starfsfólk og vinir ættu með stolti að segja: „þetta eru samtökin okkar.“

7. Árangur sé mælanlegur með rannsóknum og hvatt til frumkvæðis

Eðlilegt er að ríkisstjórnir, styrktaraðilar og samstarfsaðilar spyrji um vísindalegar rannsóknir á starfi SOS Barnaþorpanna. Virtir utanaðkomandi rannsóknaraðilar tryggja grunn samtakanna til þekkingarsköpunar og þróunar. Nauðsynlegt er að sanna gildi þess starfs sem á sér stað og að okkar umönnunaraðferðir skili árangri. Forgangsatriði þessa liðar er að: Láta mæla árangur, bera saman uppeldisform SOS Barnaþorpanna við önnur form, rannsaka gæði þjónustu sem er veitt, styðja við verndaraðgerðir til að koma í veg fyrir að börn séu yfirgefin og þróa rannsóknarhefð innan samtakanna.

8. Þróun í mannauðsstjórnun um heim allan

Það er undir starfsfólki komið hvernig tekist er á við ný markmið og nýjar áskoranir í fjáröflun, rannsóknum og þróun. Tryggja þarf símenntun, frumkvæði og sköpunarhæfni allra sem starfa hjá SOS. Þessi þáttur er fjárfesting sem nemur 2% af rekstrarkostnaði. Tryggja þarf endurmenntun SOS-mæðra, framkvæmdastjóra þorpanna og forstöðumanna ungmennaheimilanna. Einnig skal tryggt að stjórn og stjórnendur séu hæfir til að leiða starfsfólk, búa til áætlanir og bregðast við breytingum.