Fjármál

Hér að neðan má sjá upplýsingar um framlög styrktaraðila SOS Barnaþorpanna á Íslandi og það hlutfall af fjármagni sem fer beint til styrkþega. Það sem eftir verður er varið í fjáröflun, umsýslu og eftirlit hér heima og á alþjóðavísu. Fjárhæð sem greitt er til alþjóðasamtaka SOS Barnaþorpanna nýtist í meðal annars í mikilvæg eftirlits- og öryggisstörf SOS um allan heim. Með þessu fjármagni er tryggt að starfsemi í verkefnum SOS á alþjóðavísu fari rétt fram og að stuðlað sé að öryggi skjólstæðinga samtakana.  

Styrktarforeldrar

Styrktarforeldrar barna greiða 3.750:- á mánuði. Sú upphæð nýtist í grunnþarfir barnsins, fæði, klæði, menntun, heilsugæslu og fleira.  85% upphæðarinnar renna óskipt til styrkþega.

Gjafir til barna frá styrktarforeldrum renna óskipt á framtíðarreikning barnsins sem það styrkir. 100% upphæðarinnar rennur óskipt til styrkþega.

Barnaþorpsvinir

Barnaþorpsvinir greiða 3.250:-  á mánuði. Þeir styrkja uppbyggingu, viðhald og almenna starfsemi barnaþorps.  85% upphæðarinnar renna óskipt til þorpsins.

Fjölskylduvinir

Fjölskylduvinir greiða upphæð að eigin vali sem fer í fjölskyldueflingarverkefni SOS Barnaþorpanna. Fjölskylduvinir aðstoða sárafátækar fjölskyldur í leið sinni að sjálfbærni og sjálfstæði. Að lágmarki 80% upphæðarinnar renna óskipt til verkefna.

Frjáls framlög

SOS á Íslandi fær ýmsar gjafir og styrki frá einstaklingum og fyrirtækjum. Það fjármagn hefur verið nýtt í erlend verkefni, rekstur skrifstofunnar hér heima og öflun nýrra styrktaraðila. Að lágmarki 80% frjálsra framlaga skila sér til erlendra verkefna.

Opinber framlög

Opinber framlög til félagsins renna í neyðaraðstoð og þróunarverkefni erlendis. Af hverjum verkefnastyrk frá hinu opinbera leggur SOS á Íslandi til mótframlag. Því rennur allur styrkur hins opinbera auk framlags frá SOS Barnaþorpunum til verkefnanna.

Sjóðir í eigu félagsins

Allt fjármagn sem SOS á Íslandi hefur í sinni vörslu er geymt hjá fjármálastofnun í innlánum eða hjá skráðum verðbréfasjóðum. Innan félagsins eru reknir eftirfarandi 3 sjóðir:

Verkefnasjóður: Verkefnasjóður mætir kostnaði verkefna sem upp koma í þorpum og vegna uppbyggingar á svæðum þar sem Alþjóðasamtök SOS Barnaþorpanna hafa starfsemi. 

Neyðarsjóður: Fjármagn úr neyðarsjóði er nýtt þegar hamfarir og mikil vá steðjar að í heiminum. Í þessum sjóði er fjármagn geymt til að geta brugðist hratt við slíku hættuástandi.

Varasjóður: Varasjóður er nýttur til að mæta samdrætti og/ eða breytingum á rekstarhögum félagsins svo hægt sé að standa við skuldbindingar félagsins.

Öryggi

SOS Barnaþorpin hafa þróað innra eftirlitskerfi sem eykur mjög á öryggi í fjármálum samtakanna. Þá er það skýr stefna SOS Barnaþorpanna að hvers konar spilling og óreiða verði aldrei liðin.

Hér á Íslandi hefur SOS kappakostað að hafa gagnsætt bókhald og örugg fjármál með ýmsum leiðum.

Endurskoðaður ársreikningur

Ársreikningur félagsins er endurskoðaður af löggiltum endurskoðanda og staðfestur með undirskrift hans. Ársreikningur er birtur á heimasíðu félagsins eins fljótt og unnt er eftir aðalfund.

Aðgreining starfa

SOS Barnaþorpin hafa aðgreiningu á milli verkþátta sem snýr að fjármálum. Allir reikningar eru samþykktir og sá sem greiðir reikninga færir ekki bókhald og sér ekki um afstemningu á bankareikningum. Bókari hefur ekki millifærsluheimild í banka eða prókúru á hendur félaginu.

Einn reikningur fyrir félagið

SOS Barnaþorpin reka ekki önnur dótturfélög eða systrafélög sem taka þátt í kostnaði eða tekjum starfsins. Allar innkomur í nafni SOS Barnaþorpa á Íslandi koma inn á kennitölu félagins.

Ársreikningar SOS Barnaþorpanna á Íslandi:

Ársreikningur SOS Barnaþorpanna á Íslandi 2016 (pdf)

Ársreikningur SOS Barnaþorpanna á Íslandi 2015 (pdf)

Ársreikningur SOS Barnaþorpanna á Íslandi 2014 (pdf)

Ársreikningur SOS Barnaþorpanna á Íslandi 2013 (pdf)

Ársreikningur SOS Barnaþorpanna á Íslandi 2012 (pdf)

Ársreikningur SOS Barnaþorpanna á Íslandi 2011 (pdf)


Sjá nánar grein um fjármál SOS í 1. tbl. fréttablaðs SOS Barnaþorpanna 2010 (pdf), bls.13.