SOS Ungmennaheimili

SOS-ungmennaheimili

Markmið með unglingastarfi SOS barnaþorpanna

SOS barnaþorpin leggja ríka áherslu á að það unga fólk sem þeim er treyst fyrir sé hæft til að standa á eigin fótum þegar þar að kemur. Heildarmarkmið samtakanna er varðar unglingana er að kenna þeim og styrkja þá í að verða sjálfsábyrgir einstaklingar; hjálpa þeim að þróa með sér jákvæð lífsviðhorf, að þeir samlagist samfélaginu og að þeir séu færir um að sjá fyrir sér sjálfir.

SOS unglingaheimili og samfélag unglinga

Ungt fólk flytur oft úr þorpinu yfir í sérstaka aðstöðu fyrir unglinga þegar það hefur starfsnám eða framhaldsmenntun. Með stuðningi hæfs unglingaráðgjafa lærir unga fólkið að þróa með sér raunhæfar væntingar og hugmyndir um eigin framtíð, það lærir að axla ábyrgð og í auknum mæli að taka sjálfstæðar ákvarðanir. Ungmennin eru hvött til að þróa með sér liðsanda og efla samskipti við ættingja, vini, viðeigandi yfirvöld og atvinnurekendur.

Unglingahúsin sjá nokkrum hópum ungmenna frá aldrinum 14 ára fyrir heimili. Einnig er þeim boðið upp á náms- og sálfræðiaðstoð. Unglingahúsin eru misjafnlega stór og þau stærstu taka við unglingum frá fleiri en einu SOS barnaþorpi.

SOS-barnaþorpin hafa í auknum mæli horfið frá stofnanalegri umönnun svo unga fólkið eigi sjálft auðveldara með að tileinka sér sjálfstæði. Samfélög unglinga eru hönnuð með það að markmiði að geta hýst allt upp í 14 unglinga og einn ráðgjafa. Unga fólkið sér sjálft um að sinna heimilisstörfunum.

Fyrstu skrefin á vinnumarkaði

Ekki er nóg að uppfylla hæfniskröfur til að fá gott starf í dag. Engu að síður skiptir hæfni unga fólksins miklu ætli það að ná árangri á vinnumarkaði. Af þeirri ástæðu er mikil áhersla lögð á að aðstoða unglingana við val á starfsþjálfun og framhaldsmenntun.

SOS barnaþorpin eru stöðugt að reyna að gera betur og stuðla að betri þjálfun og menntun fyrir unglingana sína svo þeir verði hæfari einstaklingar og nái árangri í samfélaginu. SOS barnaþorpin bjóða upp á aðstoð sem kallast SOS-forskot (SOS head-start scheme). Aðstoðin veitir ungum mönnum og konum hagstæð lán á lágum vöxtum og með sveigjanlegum endurgreiðslum. Lánið er einkum ætlað þeim sem hafa hug á að fara út í einhvers konar sjálfstæðan rekstur.

Frekari stuðningur

SOS barnaþorpin bjóða einnig upp á sérstakan stuðning í formi eftirfylgdar þegar ástæða þykir til. SOS barnaþorpin sjá það nefnilega sem skyldu sína að tryggja unglingunum örugga framtíð eftir því sem kostur er. Þeir unglingar sem fá þessa eftirfylgd fá auka stuðning í að öðlast sjálfstæði frá þorpinu, þeir fá þjálfun í að takast á við erfiðar aðstæður sem upp gætu komið og leiðsögn í að leysa úr vandamálum tengdum fjármálum og starfi. Umfang aðstoðarinnar fer eftir þörfum hvers og eins.