Ný viðmið í umönnun barna

23.11.2009

Á fundi sínum í New York sl. föstudag fagnaði allsherjarþing Sameinuðu þjóðanna nýjum viðmiðum fyrir umönnun barna sem ekki búa hjá foreldrum sínum. SOS-barnaþorpin hafa í fimm ár farið fyrir hópi sérfræðinga við gerð þessara nýju viðmiða.

Það þykir vel við hæfi að viðmiðin hafi verið samþykkt á 20 ára afmæli Barnasáttmála SÞ.

Viðmiðin snúa að umönnun þeirra barna sem ekki búa hjá foreldrum sínum eða eiga á hættu að verða skilin frá þeim. Þannig eru viðmiðin í raun til skýringar á ákveðnum liðum Barnasáttmálans. Það var nefnd SÞ um réttindi barna sem óskaði eftir viðmiðunum og var SOS-barnaþorpunum falið að fara fyrir hópi samtaka og sérfræðinga við undirbúning þeirra.

Richard Pichler alþjóðaframkvæmdastjóri SOS-barnaþorpanna hafði þetta að segja um samþykkt viðmiðanna: „Þessi viðmið eru fyrir löngu orðin tímabær. Þau eru hugsuð til að tryggja velferð þeirra barna sem búa við þá flóknu og viðkvæmu stöðu að njóta ekki umönnunar sinna eigin foreldra eða eiga á hættu að verða skilin frá þeim. Viðurkenning viðmiðanna þýðir að hlutaðeigandi aðilar verða að hlusta á börnin og bregðast við aðstæðum þeirra og þörfum. Viðmiðin hjálpa okkur einnig að tala máli þessara barna og sinna eftirliti á þeirri þjónustu sem við veitum þeim.“

Hér má nálgast viðmiðin (á ensku).

Nánar á vefsíðu SOS Kinderdorf International.

Til baka, Senda grein, Prenta greinina