Fréttir
Meðferð með hjálp dýra
Flest börn í SOS-barnaþorpum eiga það sameiginlegt að traust þeirra á öðru fólki hefur beðið hnekki vegna misnotkunar, sinnuleysis, ofbeldis, aðskilnaðar eða fjölskyldusundrungar.
Afleiðingarnar eru m.a. óöryggi, ótti, reiði og ofbeldi auk þess sem mannleg samskipti verða erfið.
Það er hlutverk SOS-barnaþorpanna að hjálpa þessum börnum að endurvinna traust og eignast von. Og þar koma dýr mikið við sögu. Börnin geta nefnilega treyst dýrunum og smám saman endurunnið traust sitt á mannfólkinu með hjálp þeirra.
Meðferð með hjálp dýra (animal-assisted therapy) gefur börnum og unglingum færi á tilfinningalegri útrás. Dýrin eru hlutlaus og dæma ekki einstaklinginn. Þau gefa og þiggja án þess að setja fram kröfur eða skilyrði. Með því að eiga samskipti við dýr þróa börnin með sér traust, öryggi og ábyrgð.
SOS-barnaþorpin í Mersch í Lúxemborg eru í hópi þeirra barnaþorpa sem hafa um nokkurra ára skeið notast við dýr til að hjálpa börnunum. Starfsfólk SOS sér til þess að ákveðnum grunnskilyrðum sé mætt og að sérfræðingur velji rétta dýrið fyrir hvert barn.
Komið hefur verið upp hlöðu með dýrum sem þarfnast umönnunar. Börnin sem eru munaðarlaus eða yfirgefin finna að þau eiga eitthvað sameiginlegt með dýrunum. Þau gera sér grein fyrir því að dýrin eru háð aðstoð manna og samkennd myndast hjá börnunum. Smám saman fer löngun þeirra til að hlúa að dýrunum að hafa áhrif á hegðun þeirra gagnvart öðru fólki.
„Dýrinu er sama hvaðan ég er.“ (Charlotte*, 13 ára)
Dýrin spyrja engra spurninga heldur sætta sig við börnin eins og þau eru. Börnin upplifa að vera mikilvæg og finna að dýrið setur ekki upp grímu í samskiptum sínum við þau. Traustið eykst og barnið nýtir sér reynslu sína með dýrinu þegar það þarf að eiga samskipti við fólk.
„Hvers vegna er asninn sorgmæddur?“ (Sophie*, 9 ára)
Dýrin sýna tilfinningar sínar og þær örva börnin. Börnin segja öðrum frá tilfinningum og upplifunum dýranna og þannig myndast hluttekning. Reynslan sýnir að þau börn sem alast upp með dýrum eiga auðveldara með að skilja tilfinningar annarra. Hluttekning er mjög góð leið til að vinna gegn ofbeldi auk þess sem hún stuðlar að félagslegri hæfni og trausti í mannlegum samskiptum.
„Kettinum þykir vænt um mig.“ (Sophie*, 9 ára)
Samskipti barna og dýra byggjast ekki á orðum. Börn virðast eiga auðvelt með tjáskipti við dýr. Langflestum börnum finnst dýrin tala við sig og það hjálpar börnunum að ná áttum eftir áföll lífsins.
„Þér finnst ég ekki gera neitt rétt.“ (Réné*, 12 ára)
Samskipti barna við dýr laða fram styrkleika þeirra frekar en veikleika. Þau skynja að dýrið er í meiri þörf fyrir hjálp en þau sjálf.
„Judy líður alltaf vel hjá mér, sama í hvernig skapi ég er. Hún lýgur a.m.k. ekki að mér.“ (Max*, 10 ára)
Þegar traust barnsins til dýrsins eykst verður auðveldara fyrir barnið að eiga samskipti við fólk.
„Stundum er ég hræddur.“ (Max*, 10 ára)
Þegar börnin eru með dýrunum læra þau á eigin ótta og takmarkanir og hvernig megi sigrast á slíku.
„Ég varð mjög leiður þegar nýfæddur kálfurinn dó. En við erum núna móðir annars kálfs sem á ekki alvöru mömmu, eins og ég.“ (Patrick*, 6 ára)
Með því að eiga samskipti við dýrin læra börnin að takast á við lífið, s.s. fæðingu, tilgang lífsins, veikindi og dauða.
„Asnarnir hafa kennt mér að telja upp á tíu áður en ég brjálast!“ (Max*, 10 ára)
Sjálfsagi barnanna getur aukist við samskipti þeirra og dýranna.
* Ekki rétt nafn barnsins.
