Barnahjálp SOS

Fyrst og fremst eru SOS Barnaþorpin barnahjálp sem veitir munaðarlausum og yfirgefnum börnum staðgengil fyrir þá fjölskyldu sem þau hafa misst.

„Barn dettur úr hreiðri sínu. Við sjáum því fyrir móður, systkinum og heimili. Gæti ekki verið einfaldara.“
– Hermann Gmeiner stofnandi SOS Barnaþorpanna.

tpa-picture-37868.jpgSamtökin voru stofnuð í Austurríki í kjölfar síðari heimsstyrjaldarinnar árið 1949.

Auk þess að reka yfir 500 barnaþorp um allan heim standa SOS Barnaþorpin fyrir umfangsmiklu forvarnarstarfi sem kallast Fjölskylduefling SOS. Skjólstæðingar Fjölskyldueflingar eru illa staddar barnafjölskyldur og er þeim hjálpað að koma undir sig fótunum og mæta grunnþörfum barnanna. Markmiðið er að börnunum líði vel og koma í veg fyrir aðskilnað þeirra og foreldranna.

Þá reka samtökin fjölda leikskóla, grunnskóla, verknámsskóla, ungmennaheimila, samfélagsmiðstöðva, heilsugæslustöðva auk þess að sinna neyðaraðstoð.

SOS Barnaþorpin starfa óháð trúarbrögðum.

Árið 2007 fengu SOS Barnaþorpin OFID verðlaunin fyrir að vera öflug barnahjálp og stuðla að velferð barna í heiminum. Það er OPEC, samband olíuútflutningsríkja, sem veitir verðlaunin árlega.

Umfang barnahjálpar SOS Barnaþorpanna 1. apríl 2017:

Starfseining Fjöldi Styrkþegar
SOS Barnaþorp 571 84.500
SOS Leikskólar 236 24.900
SOS Grunnskólar 184 103.600
SOS Verknámsskólar 58 18.000
SOS Samfélagsmiðstöðvar 178 150.000
SOS Heilsugæslustöðvar 77 893.900
SOS Neyðaraðstoð 30

Heimsmarkmiðin

SOS Barnaþorpin vinna að heimsmarkmiðum Sameinuðu þjóðanna um sjálfbæra þróun. Um er að ræða framkvæmdaáætlun í þágu mannkynsins, jarðarinnar og hagsældar en með henni er einnig leitast við að stuðla að friði um heim allan.

Ljóst er að útrýming fátæktar í öllum sínum myndum og umfangi, að með talinni sárafátækt, er stærsta verkefnið á heimsvísu og ófrávíkjanlegt skilyrði fyrir sjálfbærri þróun. Markmið sjálfbærrar þróunar eru alls 17 og þar að auki 169 undirmarkmið. Með markmiðunum er leitast við að byggja á þúsaldarmarkmiðum Sameinuðu þjóðanna og ljúka því sem ekki náðist með þeim.
heimsmarkmid2.png 

SOS Barnaþorpin uppfylla heimsmarkmið númer 1, 4, 8, 10 og 16 að fullu. Þar að auki uppfylla þau markmið númer 3,5 og 17 að hluta.

Myndin er tekin af vef utanríkisráðuneytisins.

Mismunandi úrræði

SOS Barnaþorpin hafa þróað starf sitt í gegnum árin með það í huga að hjálpa sem flestum börnum á sem bestan hátt. Samtökin leggja mikla áherslu á aðstoð við foreldra og fylgdarlaus börn en einnig þau sem eru í hættu á að verða það. Þar sem samtökin starfa í 134 löndum er mikilvægt að vera sveigjanleg en þó einnig staðföst í þeim ólíku nálgunum sem samtökin standa frammi fyrir þegar kemur að umönnun barna. Barnaþorpin eru þó grunnstarfsemi samtakanna og í dag búa yfir 85 þúsund börn í barnaþorpum um heim allan. 

En hver sem nálgunin er setja SOS Barnaþorpin hagsmuni barnanna alltaf í forgang og hvert tilvik er metið fyrir sig. 

Þau úrræði sem SOS Barnaþorpin eru með fyrir börn sem þurfa á tímabundinni eða langtíma umönnun að halda eru eftirfarandi:

Barnaþorp: Börn búa í fjölskyldum í barnaþorpum. Í hverri fjölskyldu er SOS foreldri og fjögur til tíu börn og búa þau saman á heimili. Um er að ræða einingu sem líkist hefðbundinni fjölskyldu að öllu leyti. Í dag búa yfir 85 þúsund börn í SOS Barnaþorum um allan heim.

Fósturheimili: Þetta úrræði er algengt í löndum þar sem SOS Barnaþorpin hafa stigið inn í fósturkerfið, líkt og í Evrópu. Stundum er það lögum samkvæmt að börn þurfa að vera í fóstri og í þeim tilvikum verða SOS foreldrarnir fósturforeldrar barnanna. Í öðrum tilvikum þjálfa samtökin fósturforeldra á vegum ríkisins, útvega heimili fyrir fjölskyldurnar og fleira, allt í þeim tilgangi að börnin fái gott heimili.

Tímabundin heimili: Börn sem munu sameinast fjölskyldum sínum eða á leið í önnur úrræði (t.d. SOS Barnaþorp) fá tímabundið heimili hjá SOS.

Neyðarskýli: Tímabundið úrræði sem samtökin reka þar sem neyðaraðstoð er í gangi. Um er að ræða afar mikilvægt úrræði, t.d. í stríðshrjáðum löndum. 

Heimili fyrir móðir og börn: Tímabundið úrræði þar sem mæður geta búið með börn sín og fengið viðeigandi aðstoð.

Fjölskylduefling: Börn búa hjá líffræðilegri fjölskyldu en fá aðstoð frá SOS Barnaþorpunum.